Asebter amenzawi

Teqbel teɣlamt taqaṭarit n Al-Sadd ad tefk Bounedjah i Al-Ahly n Maṣer

LQAHIRA – Tessaweḍ Al-Ahly n Lqahira (taẓunt 1ut n tcirḍart tamaṣrit) ad temsefham d teɣlamt taqaṭarit n Al-Sadd ɣef ussekki (taḥwil) n umarir agraɣlan adzayri Baghdad Bounedjah akken ad yurar 3 n yiseggasen deg Maṣer, ɣef wakken ay d-yenna weɣmis n Al-Yaoum Sabae ass n letniyen.

Yemlal uselway n useqqamu n tedbelt n teɣlamt n Al-Ahly, Mahmoud Tahar, d uselway n Al-Sadd, Mohamed Ben Khalifa yernu stenyan leɛqed n ussekki n umarir-a ay d-yesqamen 2,8 n yimelyunen n yidulaṛen, ɣef leḥsab n weɣmis-a.

Seg yedrimen-a, ad tawi teɣlamt taqaṭarit n Al-Sadd 1,5 d amelyun n yidulaṛen, ma d Boudjenah, ad yawi 1,3 d amelyun n yidulaṛen deg tallit-nni n 3 n yiseggasen ad yeḍḍef leɛqed-nnes.

Boudjenah (yesɛan 24 n yiseggasen) yudef ɣef Al-Sadd deg unebdu n 2015, mi yestenya yid-s leɛqed n 3 n yiseggasen, deffir ma yurar deg ES Ssaḥel (Tamɣunt 1ut n Tunes), sakkin, terḍel-it teɣlamt n Al-Sadd i teɣlamt tatunsit n Susa wuɣur yurar 6 n wayyuren yernu d tallit aydeg d-terbeḥ teɣlamt-a Taqbuct n Tkunfidiṛalit.

Amarir-a ay d-ilulen deg Wehṛan, yuɣal-d ɣer Al-Sadd deg Yennayer yezrin, yernu yurar ɣer-s deg waṭas n temliliyin.

Yettwafren-d umarir-a deg wumuɣ (qa’ima) n 26 n yimariren n teɣlamt taɣelnawt n ddaw 23 n yiseggasen ad yettekkin deg tannant (tarabbuṣ) n ussewjed ay d-yebdan ass n lexmis yezrin deg Tgejda (Tubiret) i uttekki n Lezzayer deg Wuraren Ulimpiyen n Rio n 2016 (gar 5 d 21 ɣuct).