Asebter amenzawi

Brizil: reẓmen Iɣrem Ulimpi n Wuraren Ulimpiyen n 2016 n Rio

RIO DE JANEIRO – Yettwarẓem yeɣrem (qarya) ulimpi n Wuraren Ulimpiyen n 2016 n Rio ass n laṛebɛa deg temnaḍt n temdint n Rio de Janeiro. Uraren Ulimpiyen n useggas-a ad d-ilin gar 5 d 21 ɣuct n 2016.

Iɣrem-a ad ddren deg-s 10.000 n yinaddalen seg wakk timnaḍin n umaḍal, yernu yettwarẓem s weḥdaṛ n uselway n Useqqamu Agraɣlan Ulimpi, Thomas Bach.

Llan deg yeɣrem-a 31 n waṣuken (mabani) aydeg llan 3604 n tmudra (cuqaq) yernu yusa-d deg Barra da Tijuca (deg utaram [ɣarb] n Rio de Janeiro), yernu yeqreb ɣer wefrag ulimpi anda ay llan aṭas n wammasen n waddal.

Yesɛa yeɣrem-a tajumma n 200.000 n lmitrat timkuẓin (m2) yernu llant deg-s aṭas n tallunin tizegzawin, am wakken ay zemren ad ddren deg-s arma d 17.950 n yemdanen, ɣef wakken ay d-yenna uneɣlaf abrizili n waddal.

Yesqam-d lebni-nnes 2,9 n yimelyaṛen n yirealen (742 n yimelyunen n wuṛuten), yernu d tabanka tanagdudt (ɛumumiyya) n Caixa Economica Federal ay d-yefkan amur ameqran seg yedrimen-a.

« Wa d yiwen seg yiɣerman ulimpiyen icebḥen akk ay ẓriɣ », ay d-yenna Mass Bach. « Iɣrem d netta ay d ul n Wuraren. Seg-a ara teqleɛ tebṛat n Wuraren akken ad taweḍ ɣer yimezdaɣen n Rio, ɣer Yebriziliyen d umaḍal s lekmal-nnes », ɣef wakken ay d-yenna.

« Inaddalen ad mqabalen deg yiwen seg yemsizewren iweɛṛanen akk deg tudert-nsen, am wakken ara ddren deg talwit, ad ddukklen da yernu ad aznen tabṛat n talwit d leqder i umaḍal akken ma yella », ɣef wakken ay d-yerna.