Asebter amenzawi

Tabatent: 100 n yimelyunen n yidinaṛen i yimenɣi mgal unneẓref (amasay)

TABATENT– Ttejṛiba-nni turbiḥt n yimenɣi mgal unneẓref (taṣaḥḥur) d usserked n yigidan (kutban) deg tjumma n 450 n yiqeṭṭaren deg tɣiwant n Bitam (Tabatent) d ayen ay d-yesqamen 100 n yimelyunen n yidinaṛen i lxezna n uwanak, ɣef wakken ay d-yenna yiɣef n umeẓlu n uḥuddu n wakal d weḥraz n tẓegwa, Yacine Garouni.

Tamhelt-a (ɛamaliyya) ay d-yellan gar 2006 d 2010 d tin aydeg ẓẓan tizemrin deg 5.000 n yiqeṭṭaren n wakal yernu amur ameqran seg tzemrin-nni bdant ttafkent-d azemmur, am wakken ay d-heyyan 190 n tmedwa i wessway n wakal i lmend n usserked n yimezdaɣen idiganen (maḥalliyya), ɣef wakken ay d-yenna umasay-a deg yijifeṛ n yiwen n wass n wezraw ay d-yellan deg wefrag aɣelnaw n Bellezma i lmend n wass anmaḍal n yimenɣi mgal unneẓref.

Tessaweḍ ttejṛiba-a ɣer « uɛawed n wemɣay n tduli n yemɣan yellan deg temnaḍt n Bitam yernu yegla-d waya s lfayda tadamsant-tanmettit tusridt i yimezdaɣen n temnaḍt-a », imi ay uɣalen leqqḍen azemmur, am wakken ay yessafses waya adaf n yigerdan ɣer uɣerbaz d ussenqes deg waḍḍanen n tiṭṭawin d uneffes, ɣef wakken ay d-tenna Rachida Kadhi ay d-igan tasersit (uṭruḥa) n Umastir wis 2 deg tesdawit n Montpellier (Fṛansa) ɣef temsalt-a.

Iɣerman n Wlad Ǧḥic, Meksem Ḍaya d Lekrarif tuɣal-d ɣer-sen tudert s ccɣel-a n tririt n tizzegzewt i temnaḍt-a, ɣef wakken ay d-tenna tesdawant-a.

Seg gar 450 n yisenfaren ay teqbel tedbelt n weḥraz n tẓegwa gar 2009 d 2014 s wazal n 4,5 n yimelyaṛen n yidinaṛen, 80 seg-sen sqamen-d 2 n yimelyaṛen n yidinaṛen yernu ttwasqedcen i yimenɣi mgal unneẓref, ɣef wakken ay d-yenna Mass Garouni, am wakken ay d-yerna dakken 25 seg 61 n tɣiwanin n Tbatent sɛant yagi lumiṛat n beddu n unneẓref yernu 18 seg-sent ḥwajent ccɣel uɛjil i weḥbas n wexṣar n wakal-nsent anzawaɣ (suhbi).