Asebter amenzawi
Timlilit n Bamako d tagnit i ussukku n tiṭ ɣef ussefɛel n wemtawa n talwit (Azawad)
LEZZAYER TAMANEƔT - Yenna-d ugensas (mumattil) n Tsemyuddest n Yimussa n Uzawad, Bilal Ag Cherif, ass n ssebt deg Ldzayer Tamaneɣt, dakken ad yettekki deg temlilit n Bamako n Useqqamu n Weḍfar n Ussefɛel n Wemtawa n Talwit d Wemsuɣal deg Mali ay d-yefrurin seg lemcawṛat n Ldzayer, am wakken ay d-yenna dakken timlilit-a d tagnit i ussukku n tiṭ ɣef tarrayin n ussefɛel n ccuruḍ igejdanen ay d-yeddan deg wemtawa-nni s tukksa n yiɛewwiqen ay ibedden deg webrid deg wayen yerzan tasertit, lemɛawna n medden ixuṣṣen d weḍman n tɣellist (amn) deg ugafa n Mali.
Deg yiwet n tseɣrut (taṣriḥ) i tɣemsa deffir ummuger ay t-yemmuger uneɣlaf n tɣawsiwin n wezɣar, Ramtane Lamamra, yenna-d Mass Ag Cherif daken yessukk-d tiṭ d Mass Lamamra ɣef ttawilat n usseɛjel n ussefɛel n wemtawa (ittifaq) n talwit d wemsuɣal ay stenyan yidisan imaliyen ddaw leɛnaya n tebdammast tagraɣlant yellan ddaw ṛṛay n Ldzayer.
Yebder-d daɣ amtawa-nni ay yettwastenyan, seg melmi kan, d unabaḍ (ḥukuma) amali ɣef teftart (watiqa) n wemsefham ɣef ttawilat n ussefɛel n wemtawa-nni agejdan, d amsefham ay d-yellan ɣef tedbelt ara yesseddun tiɣawsiwin seg leɛḍil, yernu wa d yiwen seg ccuruḍ yezwaren n wemtawa-nni n talwit d wemsuɣal.
Deg temlilit n Useqqamu n Weḍfar ara d-yilin deg Bamako, ad d-ssukken tiṭ ɣef ttawilat n ussefɛel n ccuruḍ igejdanen n wemtawa n talwit d wemsuɣal yernu d aya ara d-yilin d llsas i wezraw (dirasa) n wayen ay ḥwajen yimezdaɣen d yezrazaɣen (laǧi’in) n temnaḍt n Uzawad.
Anabaḍ amali d yimussa isertanen-iserdasanen ay yestenyan amtawa n talwit d wemsuɣal deg Mali msefhamen ad d-sbedden iduba idiganen (suluṭat maḥalliyya) deg 5-nni n temnaḍin tideblanin n ugafa n Mali, ɣef wakken ay d-tenna Minusma (Iɣlanen Yeddukklen) ass n laṛebɛa yezrin.
