Asebter amenzawi

Teqleɛ Ariane 5 s sin n yigensaten

KOUROU– Teqleɛ tmeẓdit tamaẓayt tuṛufit n Ariane 5 ass n ssebt seg Wammas Allunan n Guyana Tafṛensist (deg Kourou) ɣef tis 6:38 n tmeddit s wakud adigan (maḥalli) (tis 9:38 n tmeddit s wakud n Greenwich).

Timeẓdit n Ariane 5 tewwi yid-s sin n yigensaten (aqmar ṣinaɛiyya) n teɣwalt tanemgagt. Yiwen seg-sen d Echo Star XVIII n teṛmist n Dish Network, ma d wayeḍ d agensa n BRIsat n tbanka tindunisit n Rakyat Indonesia.

D ta ay d timeẓdit tis 3 n Ariane 5 ara yettwaznen aseggas-a, yernu d nettat ay d timeẓdit tis 230 ara yettwaznen seg twacult n Ariane. Mi tettwacir, tɛedda tmeẓdit-a ɣef usigna-nni ay d-yesberbren ɣef temnaḍt, yernu yezga yettili usigna deg temnaḍt-a deg tallit n yigefran. Azal n 1000 n yemfeṛṛǧen ay d-yusan ad ẓren aciri-a seg yideggen n wannay (muraqaba) n uzadur (qaɛida) allunan n Kourou, ɣef wakken ay d-tenna tnegga tafṛensist n AFP.

Snat n tedqiqin d 21 n tsinin deffir ma teqleɛ, tebra-d Ariane 5 i tmeẓdiyin-nnes n ussejhed yernu ɣlint deg ugaraw Aṭlasi, ɣef leḥsab n Arianespace, taṛmist (carika) ay yettcirin timeẓdit-a.

Timeẓdit-a yessefk ad tessers deg weḥbu (madar) agensa n Echo Star XVIII 29 n tedqiqin deffir uciri. Agensa-a n tliẓri d win ara yessiwḍen ahilen n tliẓri i Yiwanaken Yeddukklen, Alaska d Hawai i tallit n 15 n yiseggasen yernu d taṛmist tamarikanit n Dish Network ara t-iɣellten.

Agensa wis sin ara tessers Ariane 5 deg weḥbu d agensa n BRIsat, yernu ad d-yili waya 42 n tedqiqin deffir uciri, yernu d tikkelt tamezwarut deg umezruy aydeg ara yettwazen ugensa yellan d ayla n tbanka. Bank Rakyat Indonesia d tabanka yesɛan 53 n yimelyunen n yemsaɣen deg Indunisya, ɣef leḥsab n Arianespace.