Asebter amenzawi

Aɣawas aɣelnaw n yimenɣi mgal usida: tuzwirt i ussenqes n wid yettmettaten d wenṭaḍ n waḍḍan-a

LEZZAYER TAMANEɣT– Yenna-d unemhal n tmurt deg Tuddsa n Yeɣlanen Yeddukklen i yimenɣi mgal usida (ONUSIDA), Adel Zeddam, dakken ahil aɣelnaw asuddsan (istratiǧi) n yimenɣi mgal usida (2016-2020) ay d-yettwakecfen seg melmi kan d win ara iwten akken ad yessenqes wid yettmettaten seg waḍḍan-a yernu ad yessenqes anṭaḍ n waḍḍan-a seg tyemmat ɣer wegrud.

Mi d-iqeddem tinqiḍin tigejdanin n wahil-a, yenna-d Mass Zeddam dakken taftart-a (watiqa) tefka tuzwirt i ussenqes wefmiḍi (nisba) n tmettant seg usida d wenṭaḍ seg tyemmat ɣer wegrud ɣer ddaw 5%. S waya, iswi netta d aḍman n tudert i 90% seg tyemmatin d yigerdan yesɛan asida.

Iswi niḍen d assenqes n wemḍan n yimuḍinen imaynuten ɣer ddaw 500, yernu ad d-yili waya i ussiweḍ, seg-a ɣer 2030, ɣer yeswi wis 3 n unnefli (tanmiya) aduman yekkaten i weḍman n « tdawsa (ṣiḥḥa) d tudert yelhan i wakk medden », ɣef wakken ay d-yenna Mass Zeddam.

Aɣawas-a n yimenɣi mgal usida d asseɣzef n uɣawas-nni yezrin (2013-2015) yernu yeḥwaj azal n 157 n yimelyunen n yidulaṛen, yernu awanak (dawla) ad d-yefk 95% seg yedrimen-a, ma d ayen ay d-yeqqimen ad t-id-yefk unagraw (niḍam) n Yeɣlanen Yeddukklen n ONUSIDA d yemṣeddqen igraɣlanen.

Yenna-d daɣ Mass Zeddam dakken yessefk ad d-yettekki daɣ weḥric uslig deg uɣawas-a aɣelnaw yernu attekki-a ad d-yili ladɣa deg uxeddim n uḥezzeb d wesḥulfu ɣef waḍḍan-a.