Asebter amenzawi
Yebda-d Lamamra tirzi n uxeddim n sin n wussan ɣef Mali
BAMAKu – Yebda-d uneɣlaf n tɣawsiwin n wezɣar, Ramtane Lamamra, ass n lḥedd, tirzi n uxeddim n sin n wussan ɣef Bamako (Mali), d tin aydeg ara yesselwi, ɣer yidis n wemtil-nnes amali, Abdoulaye Diop, tadwilt tis 11 n Useqqamu Asindisan Asuddsan Adzayri-Amali i Ugafa n Mali.
Mi yewweḍ Mass Lamamra ɣer Bamako, d aneɣlaf n Yimaliyen n wezɣar, Abderamane Sylla, ay t-yemmuggren ɣer yidis kra n yimasayen (mas’ulin) n yimussa isertanen-iserdasanen n ugafa n Mali.
Tadwilt-a ad d-teɣli deg wass n umulli n ufaki n westenyi n Wemtawa n Talwit d Wemsuɣal n Mali ay d-yefrurin seg lemcawṛat n Lezzayer Tamaneɣt.
Yiwen wass uqbel ma yeqleɛ ɣer Bamako, iwekked-d Mass Lamamra ass n ssebt deg Lezzayer Tamaneɣt deg yiwet n tseɣrut (taṣriḥ) i tɣemsa deffir wemyager-nnes d ugensas (mumattil) n Tsemyuddest n Yimussa n Uzawad, Bilal Ag Cherif, dakken « amulli amezwaru n westenyi n wemtawa n talwit d wemsuɣal aɣelnaw deg Mali ad yili d abeddu amaynu s ṛṛuḥ-nni n lebni yellan yagi i lmend n ussefɛel n wakk ccuruḍ n talwit d wemsuɣal ».
Ad yemlil Mass Lamamra, deg terzi-a, d yimaslaḍen (aɛḍa’) n Useqqamu n Weḍfar n Wemtawa ay tesselwi Lezzayer i lmend n uqeyyem n tegnit wuɣur yewweḍ ussefɛel n Wemtawa-a d ussefru n ttawilat n ussejhed n ussefɛel-a.
