ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵡⴻⵀⵕⴰⵏ: ⴷⴷⵓⵕⵜ ⵉ ⵓⴼⴰⴽⵉ ⵏ ⵢⵉⵅⴻⴷⴷⵉⵎⴻⵏ ⵏ ⵓⵙⵙⴻⵎⵖⴻⵔ ⵏ ⵡⴻⵣⵏⵉⵇ ⴰⴳⴻⵊⴷⴰⵏ
ⵡⴻⵀⵕⴰⵏ – ⵢⴻⴼⴽⴰ ⵓⵡⴰⵍⵉ ⵏ ⵡⴻⵀⵕⴰⵏ, ⴰⵙⵙ ⵏ ⵍⵃⴻⴷⴷ, ⵜⴰⵍⵍⵉⵜ ⵏ ⴷⴷⵓⵕⵜ ⵉ ⵓⴼⴰⴽⵉ ⵏ ⵢⵉⵅⴻⴷⴷⵉⵎⴻⵏ ⵏ ⵓⵙⵙⵉⵀⵔⴻⵡ ⵏ ⵡⴻⵃⵔⵉⵛ ⵡⵉⵙ ⵙⵉⵏ ⵏ ⵡⴻⵣⵏⵉⵇ ⴰⵎⴻⵇⵔⴰⵏ ⵏ ⵡⴻⴳⵎⴰⵎ (ⵃⴰⵢⵢ) ⵏ « ⴱⴰⵙⵜⵉⴻ » ⵢⴻⵇⵇⵏⴻⵏ ⵖⴻⵔ ⵢⴻⴱⴹⵉ ⴰⵎⴷⵉⵏⴰⵏ ⵏ « ⵉⴱⵏ ⵙⵉⵏⴰ » ⵏ ⵡⴻⵀⵕⴰⵏ.
« ⵢⴻⵙⵙⴻⴼⴽ ⴰⴷ ⵜⵜⵡⴰⵙⵙⵉⵀⴻⵔⵡⴻⵏ ⴽⵔⴰ ⵏ ⵢⴻⵣⵏⵉⵇⴻⵏ ⵉⴳⴻⵊⴷⴰⵏⴻⵏ ⵢⴻⵔⵏⵓ ⴱⴷⴰⵏ-ⴷ ⵢⵉⵅⴻⴷⴷⵉⵎⴻⵏ ⵉ ⵓⵙⵙⵉⵙⵍⴻⴳ ⵏ ⵢⴻⴱⵔⵉⴷⴻⵏ ⵉ ⵓⴼⴻⵔⵔⵓ ⵏ ⵡⵓⴳⵓⵔ ⵏ ⵓⴷⴰⴼⴰⵙ (ⵉⵣⴷⵉⵃⴰⵎ) ⵙⴷⴰⵅⴻⵍ ⵜⴻⵎⴷⵉⵏⵜ. ⴷ ⴰⵛⵓ ⴽⴰⵏ, ⵉⵛⴰⵏⵟⵉⵢⴻⵏ ⵛⴻⵡⵡⵍⴻⵏ ⵜⴰⴳⵏⵉⵜ, ⵍⴰⴷⵖⴰ ⴷⴻⴳ ⵓⵏⴻⴱⴷⵓ. ⵖⴻⴼ ⵡⴰⵢⴰ, ⵢⴻⵙⵙⴻⴼⴽ ⴰⴷ ⵉⵖⵉⵡⴻⵍ ⵡⴻⵏⵢⴰ (ⵡⴰⵜⵉⵔⴰ) ⵏ ⵓⵅⴻⴷⴷⵉⵎ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵡⴰⵍⵉ ⵎⵉ ⵢⴻⵙⵙⴻⴼⵇⴻⴷ ⴰⵛⴰⵏⵟⵉ-ⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵉⵃⴻⵜⵜⴻⵜ ⵖⴻⴼ ⵜⵖⴰⵔⴰ ⵏ ⵓⵅⴻⴷⴷⵉⵎ.
ⵉⵅⴻⴷⴷⵉⵎⴻⵏ ⵏ ⵓⵙⵙⵉⵀⵔⴻⵡ ⴷ ⵓⵙⵙⵉⵙⵍⴻⴳ ⵏ ⵡⴻⵣⵏⵉⵇ-ⴰ ⴰⴷ ⴷ-ⵙⵇⴰⵎⴻⵏ 50 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵉⵏⴰⵕⴻⵏ ⵢⴻⵔⵏⵓ ⴱⴷⴰⵏ ⵓⴳⴰⵔ ⵏ ⵙⵉⵏ ⵏ ⵡⴰⵢⵢⵓⵔⴻⵏ ⴰⵢⴰ. ⴰⴷ ⵢⵉⵍⵉ ⴷⴰⵖ ⵡⴻⴼⵔⴰⴳ ⴳⴰⵔ ⵙⵉⵏ-ⵏⵏⵉ ⵏ ⵢⴻⵃⵔⵉⵛⴻⵏ ⵏ ⵡⴻⵣⵏⵉⵇ-ⴰ ⵎⵉ ⴰⵔⴰ ⵢⴻⵜⵜⵡⴰⵙⵙⵉⵙⵍⴻⴳ, ⴰⵎ ⵡⴰⴽⴽⴻⵏ ⴰⵔⴰ ⴱⴻⵍⵍⴹⴻⵏ ⴷⴰⵖ ⵜⵉⵏⴻⴷⴷⴰ (ⴰⵔⵚⵉⴼⴰ) ⵏ ⵡⴻⵣⵏⵉⵇ-ⴰ.
ⵉⵅⴻⴷⴷⵉⵎⴻⵏ-ⴰ ⴷⴻⵔⵔⴻⵔⴻⵏ ⴷⴰⵖ ⴰⴱⵔⵉⴷ-ⴰ ⵖⴻⵔ ⵜⴰⵎⴰ ⵏ ⵡⴻⵣⵏⵉⵇ ⴰⵎⴻⵇⵔⴰⵏ ⵡⵉⵙ ⵙⵉⵏ, ⵢⴻⵔⵏⵓ ⵢⴻⵍⵍⴰ-ⴷ ⵡⴰⵢⴰ ⵙ ⵜⵓⴽⴽⵙⴰ ⵏ ⴽⵔⴰ ⵏ ⵜⵃⵓⵏⴰ ⵙⴻⴳ ⵡⴻⵎⴽⴰⵏ-ⵏⵏⵉ.
7 ⵏ ⵍⵎⴰⵃⴻⵍⵍⴰⵜ ⵏ ⵓⵚⴻⴳⴳⴻⵎ ⵏ ⵜⴽⴻⵕⵕⵓⵙⵉⵏ ⵓⵎⵉ ⴱⴻⴷⴷⵍⴻⵏ ⴰⵎⴽⴰⵏ ⴰⴽⴽⴻⵏ ⴰⴷ ⴳⴻⵏ ⴰⵅⴻⴷⴷⵉⵎ-ⴰ. ⵉⴳⴰⵕⴰⵊⴻⵏ-ⴰ ⵡⵡⵉⵏ-ⵜⴻⵏ ⵖⴻⵔ ⵜⴰⵎⴰ ⵏ ⵓⵙⴰⵔⵉⵔ (ⵎⴰⵍⵄⴰⴱ) ⵏ « ⵛⴰⵙⵜⵧⵔⵙ » ⴰⵢ ⵉⴱⴻⵄⴷⴻⵏ ⴽⵔⴰ ⵏ ⵜⵡⵉⵏⴰⵙ (ⵎⵉ’ⴰⵜ) ⵏ ⵢⵉⵎⵉⵜⵔⴻⵏ ⵖⴻⴼ ⵓⵛⴰⵏⵟⵉ-ⴰ.
ⵉⵅⴻⴷⴷⵉⵎⴻⵏ ⵏ ⵓⵙⵙⵉⵀⵔⴻⵡ ⵏ ⵡⴻⴱⵔⵉⴷ ⵜⴻⵍⵀⴰ-ⴷ ⵢⵉⴷ-ⵙⴻⵏ ⵜⵖⵉⵡⴰⵏⵜ ⵏ ⵡⴻⵀⵕⴰⵏ ⴷⴻⴳ ⵓⴽⴰⵜⴰⵔ ⵏ ⵓⵙⴻⵏⴼⴰⵔ ⵏ ⵓⵙⵙⵉⵀⵔⴻⵡ ⵏ ⴽⵔⴰ ⵏ ⵢⵉⵣⴻⵏⵇⴰⵏ ⵉⴳⴻⵊⴷⴰⵏⴻⵏ ⵏ ⵜⴻⵎⴷⵉⵏⵜ ⵏ ⵡⴻⵀⵕⴰⵏ ⵢⴻⵜⵜⵡⴰⵙⵙⵏⴻⵏ ⵙ ⵢⵉⴷⴰⴼⴰⵙⴻⵏ.
