ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵙⵓⵇ ⴰⵀⵕⴰⵙ: ⴰⵡⵊⴰⴷ ⵏ ⵡⴰⵛⵃⴰⵍ ⵏ ⵜⴻⵎⵚⵓⴽⵉⵏ ⵜⵉⴷⴻⵍⵙⴰⵏⵉⵏ ⵓⵇⴱⴻⵍ ⵜⴳⴰⵔⴰ ⵏ 2016

ⵙⵓⵇ ⴰⵀⵕⴰⵙ– ⵜⴻⵏⵏⴰ-ⴷ ⵜⵎⴻⵀⵍⴰ (ⵎⵓⴷⵉⵔⵉⵢⵢⴰ) ⵏ ⵢⴻⴷⵍⴻⵙ ⵏ ⵜⵡⵉⵍⴰⵢⵜ ⵏ ⵙⵓⵇ ⴰⵀⵕⴰⵙ ⴷⴰⴽⴽⴻⵏ ⴰⵛⵃⴰⵍ ⵏ ⵜⴻⵎⵚⵓⴽⵉⵏ (ⵀⴰⵢⴰⴽⵉⵍ) ⵉⴷⴻⵍⵙⴰⵏⴻⵏ ⴰⵔⴰ ⴷ-ⵉⵡⴻⵊⴷⴻⵏ ⴷⴻⴳ ⵜⵡⵉⵍⴰⵢⵜ-ⴰ « ⵓⵇⴱⴻⵍ ⵜⴳⴰⵔⴰ ⵏ ⵓⵙⴻⴳⴳⴰⵙ-ⴰ ».

ⵍⴻⴱⵏⵉ ⵏ ⵢⵉⵙⴻⵏⴼⴰⵔⴻⵏ-ⴰ ⵢⴻⵡⵡⴻⴹ ⵖⴻⵔ ⵜⴻⴳⵏⵉⵜ ⵢⴻⴷⴷⴰⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⴻⵖⴱⴰⵍⵓⵜ-ⴰ (ⵎⴰⵚⴷⴰⵔ), ⴰⵎ ⵡⴰⴽⴽⴻⵏ ⴰⵢ ⴷ-ⵜⴻⵔⵏⴰ ⴷⴰⴽⴽⴻⵏ ⵉⵙⴻⵏⴼⴰⵔⴻⵏ-ⴰ ⵔⵣⴰⵏ ⵍⴻⴱⵏⵉ ⵏ ⵡⴻⵅⵅⴰⵎ ⵏ ⵢⴻⴷⵍⴻⵙ ⵏ ⵜⴰⵀⴰⵔ-ⵧⵓⴻⵜⵜⴰⵔ (ⴷⴻⴳ ⵜⴻⵎⴷⵉⵏⵜ ⵏ ⵙⵓⵇ ⴰⵀⵕⴰⵙ), ⴰⵖⴻⵔⴱⴰⵣ ⵏ ⵓⵥⴰⵡⴰⵏ ⴷ ⵓⵎⴻⵣⴳⵓⵏ ⵉⵔⴻⵥⵎⴻⵏ, ⴷ ⵓⵚⴻⴳⴳⴻⵎ ⵏ ⵓⵎⴻⵣⴳⵓⵏ ⴰⵎⵏⴰⴹⴰⵏ ⵏ ⵎⵧⵙⵜⴰⴼⴰ-ⴽⴰⵜⴻⴱ ⴰⵢ ⵢⴻⵜⵜⵡⴰⴱⵏⴰⵏ ⴷⴻⴳ 1931.

ⵉⵅⴻⴷⴷⵉⵎⴻⵏ ⵏ ⵓⵚⴻⴳⴳⴻⵎ ⵏ ⵍⴱⴻⵏⵢⴰⵏ-ⴰ ⴰⴷⴻⵍⵙⴰⵏ ⵜⵜⵡⴰⵡⴻⴽⴽⵍⴻⵏ ⵉ ⵢⵉⵡⴻⵜ ⵏ ⵜⴻⵕⵎⵉⵙⵜ (ⵛⴰⵔⵉⴽⴰ) ⵢⴻⵎⵎⵓⵣⵣⴳⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵜⵅⴻⴱⴱⴻⵔ ⵜⵎⴻⵀⵍⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵜⵡⴻⴽⴽⴻⴷ ⴷⴰⴽⴽⴻⵏ ⴰⵛⴰⵏⵟⵉ-ⴰ ⵏ ⵓⵚⴻⴳⴳⴻⵎ ⵢⴻⵔⵣⴰ ⴰⵛⴻⵎⵎⴻⵄ ⵏ ⵍⴱⴻⵏⵢⴰⵏ-ⴰ ⴰⴽⴽⴻⵏ ⵓⵔ ⵜ-ⵜⵜⴰⴷⴼⴻⵏ ⵡⴰⵎⴰⵏ, ⴰⵚⴻⴳⴳⴻⵎ ⵏ ⵓⵙⴰⵢⴻⵙ ⴷ ⵡⴻⵙⴼⴰⵡ (ⵉⴹⴰ’ⴰ) ⴷ ⵓⵙⵙⴻⵔⵙⵉ ⵏ ⵜⵜⴰⵡⵉⵍⴰⵜ ⵏ ⵡⴻⵙⵏⴻⵣⵡⵉ.

ⵍⴱⴻⵏⵢⴰⵏ-ⴰ ⴰⵥⵓⵔⴰⵏ (ⴼⴰⵏⵏⵉ) ⴷ ⵡⵉⵏ ⴰⵔⴰ ⵢⴻⵙⵊⴻⵀⴷⴻⵏ ⴰⵃⵔⵉⵛ ⵏ ⵢⴻⴷⵍⴻⵙ ⴷⴻⴳ ⵜⵡⵉⵍⴰⵢⵜ-ⴰ ⵢⴻⵔⵏⵓ ⵢⵓⵙⴰ-ⴷ ⴷⴻⴳ ⵜⵍⴻⵎⵎⴰⵙⵜ ⵏ ⵜⴻⵎⴷⵉⵏⵜ ⵏ ⵙⵓⵇ ⴰⵀⵕⴰⵙ. ⴰⵎⴻⵣⴳⵓⵏ-ⴰ ⵢⴻⵙⵄⴰ 650 ⵏ ⵜⴻⵙⵖⵉⵎⵉⵏ (ⵎⴰⵇⴰⵄⵉⴷ) ⵢⴻⵔⵏⵓ ⵀⴻⵢⵢⴰⵏ-ⴷ ⵜⴰⵊⴻⵍⵍⴰⴱⵜ ⵏ 80 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵉⵏⴰⵕⴻⵏ ⵉ ⵓⵚⴻⴳⴳⴻⵎ-ⵏⵏⴻⵙ.

ⵖⴻⴼ ⵍⴻⵃⵙⴰⴱ ⵏ ⵜⵎⴻⵀⵍⴰ ⵏ ⵢⴻⴷⵍⴻⵙ, ⴰⴼⵎⵉⴹⵉ (ⵏⵉⵙⴱⴰ) ⵏ ⵍⴻⴱⵏⵉ ⵏ ⵡⴻⵅⵅⴰⵎ ⴰⵎⴰⵢⵏⵓ ⵏ ⵢⴻⴷⵍⴻⵙ ⵏ ⵜⴻⵎⴷⵉⵏⵜ ⵏ ⵙⵓⵇ ⴰⵀⵕⴰⵙ ⵢⴻⵡⵡⴻⴹ ⵖⴻⵔ 95%. ⴰⵅⵅⴰⵎ-ⴰ ⵏ ⵢⴻⴷⵍⴻⵙ ⴰⴷ ⵢⴻⵙⵄⵓ 3 ⵏ ⵜⵣⴻⵖⵡⵉⵏ ⵏ ⵢⵉⵀⴰⵏⴰⵢⴻⵏ (ⵄⵓⵔⵓⴹ) ⴷ ⵜⵏⴻⵎⵙⴰⵍ.

ⵍⴻⴱⵏⵉ ⵏ ⵓⵖⴻⵔⴱⴰⵣ ⵏ ⵓⵥⴰⵡⴰⵏ ⴷ ⵓⵎⴻⵣⴳⵓⵏ ⵉⵔⴻⵥⵎⴻⵏ (ⴰⵔⴰ ⵢⴻⵙⵄⵓⵏ 3.600 ⵏ ⵢⵉⵎⵓⴽⴰⵏ) ⵍⴰ ⵢⴻⵜⵜⴻⴷⴷⵓ ⵙ ⵡⴻⵏⵢⴰ (ⵡⴰⵜⵉⵔⴰ) ⵢⴻⵍⵀⴰⵏ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⴰⵙⵖⵉⵎⵜ (ⵎⴰⵇⴰⵔⵔ) ⵜⴰⵎⴰⵢⵏⵓⵜ ⵏ ⵜⵎⴻⵀⵍⴰ ⵏ ⵢⴻⴷⵍⴻⵙ (ⴰⵢ ⴷ-ⵢⵓⵙⴰⵏ ⴷⴻⴳ ⵜⴻⵣⴳⴻⵍⵜ ⵜⴰⴷⴻⵍⵙⴰⵏⵜ ⵏ ⵜⴻⵎⴷⵉⵏⵜ ⵏ ⵙⵓⵇ ⴰⵀⵕⴰⵙ), ⵍⴻⴱⵏⵉ-ⵏⵏⴻⵙ ⵢⴻⵍⵍⴰ-ⴷ ⵙ ⵡⴻⵏⵢⴰ ⴷ ⴰⵔⵓⵔⴰⴷ.