Asebter amenzawi

Tacirḍart/CA Tabatent: snat n tannanin n ussewjed deg Tbatent d Tunes

TABATENT– Taɣlamt n CA Tabatent ay d-yulin ɣer Temɣunt 1ut n tcirḍart, ad teg snat n tannanin (tasabbuṣat) deg Tbatent d Tunes akken ad tessewjed iman-nnes i tsemhuyt (mawsim) n 2016-2017, ɣef wakken ay d-nnan yemḍebbren n teɣlamt-a ass n lexmis.

Tannant tamezwarut ad d-tili seg wass n 27 Yunyu d asawen, ad tebdu deg usarir (malɛab) n Mostafa-Sefouhi yernu isleɣmuyen-nnes (tadribat) ad d-ttilin yal ass deg yiḍ arma d asmi ara ifak wayyur n Remḍan. Aḥric wis sin n tannant-a ad d-yili deffir lɛid tameẓyant deg uɣerbaz aɣelnaw n waddalen ulimpiyen n Lbaz deg Sḍif, ɣef wakken ay aɣ-d-nnan yemḍebbren n teɣlamt.

Sakkin, ass n 27 Yulyu, ad teddu teɣlamt-a ɣer wammas n El-Mouradi, deg Ḥemmam Bourguiba, sdat temdint n Tbeṛka (deg Tunes) akken ad teg tannant-nnes tis snat ara yeḍḍfen azal n 10 n wussan.

Yettwafren wemkan-a acku yesɛa kra n lfaydat imi din, taɣlamt-a tezmer ad taf icriken wukud ara turar urar n wesleɣmu yernu d aya ara yeǧǧen imariren n CA Tabatent ad tebdu tasemhuyt ay d-yetteddun akken yelha.

ɣef leḥsab n tmehla (mudiriyya) n teɣlamt-a, ammas-a atunsi yesɛa ttawilat yelhan i ussewjed, gar-asent tanerdabt (masbaḥ) taẓɣalant, anrar n tcirḍart s tedxent, inurar n utinis d wemnenniḍ n tazzla deg wedrar yellan d amkan yelhan akken ad neffsen deg-s yinaddalen.