Asebter amenzawi
Ammasen n yimuras: abdad yelhan i yigerdan (aneɣlaf)
ƐIN TIMUCENT – Yenna-d uneɣlaf n yilemẓiyen d waddal, El Hadi Ould Ali, ass n lexmis deg Ɛin Timucent, dakken imuras n yigerdan deg wammasen n yimuras la d-ttilin « deg tegnatin igerrzen ».
« Ammasen n yimuras d uzala (tasliya) bdan axeddim deg tegnatin igerrzen », ɣef wakken ay d-iwekked uneɣlaf deffir ma yerza ɣef wammas n yimuras n tedwant « Berrahou-Bounouar » ay d-yusan deg tɣiwant n Terga (ɣef yiri n yilel), deg tdayṛa n Lmaleḥ.
« Tanezduɣt, assečči, tezdeg d tɣellist akk lhan, am wakken ay yelha daɣ wahil n ussekfeḍ (tanciṭ) asnesegman d waddalan », ɣef wakken ay d-yenna Mass Ould Ali, ay d-yernan dakken « ɛejbent-t tegnatin-a n wethelli ».
Yeɛjeb-as daɣ i uneɣlaf wemɛawen gar yeḥricen yemgerraden yernu d aya ay yesrebḥen ahil aseggasan ay d-yessuddes weɣlif-nnes i lfayda n yigerdan n twilayin n wenẓul (ǧanub) n Yegnan Unnigen.
Ammas n yimuras n Terga yemmuger 200 n yigerdan ay d-yusan seg twilayt n Ssɛida, yernu ta d tadwilt tamezwarut n ummager ay la d-yettilin gar 18 Yunyu d 2 Yulyu. S ujemmal, ad yemmager wammas-a 1000 n yigerdan deg 5 n tedwilin.
Deg tmurt s umata, 38.000 n yigerdan ara d-yesfaydin seg tɣimit deg 25 n wammasen, izebrizen n yilemẓiyen d yiɣerbazen ay d-yusan deg twilayin n yiri n yilel.
