ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⵣⴰⵍ ⵏ 1.000 ⵏ ⵢⵉⴽⴰⵔⴰⴼⴻⵏ ⴰⵢ ⵢⴻⵜⵜⵡⴰⴼⴻⵔⵇⴻⵏ ⵖⴻⴼ ⵢⵉⵎⵓⴹⵉⵏⴻⵏ ⵏ ⵢⴻⵙⴱⵉⵟⴰⵔⴻⵏ ⵏ ⵎⵓⵙⵜⴰⵒⵀⴰ-ⵒⴰⵛⵀⴰ ⴷ ⵣⴻⵎⵉⵔⵍⵉ
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⴰⵣⴰⵍ ⵏ 1.000 ⵏ ⵢⵉⴽⴰⵔⴰⴼⴻⵏ ⴷ ⵢⵉⴼⴰⵔⵉⵙⴻⵏ (ⵎⴰⵏⵜⵓⴵⴰⵜ) ⵏⵉⴹⴻⵏ ⴰⵢ ⵢⴻⵜⵜⵡⴰⴼⴻⵔⵇⴻⵏ, ⴰⵙⵙ ⵏ ⵍⴻⵅⵎⵉⵙ, ⵖⴻⴼ ⵢⵉⵎⵓⴹⵉⵏⴻⵏ ⵏ ⵢⴻⵙⴱⵉⵟⴰⵔⴻⵏ ⵏ ⵎⵓⵙⵜⴰⵒⵀⴰ-ⵒⴰⵛⵀⴰ ⴷ ⵣⴻⵎⵉⵔⵍⵉ (ⵍⵃⴻⵕⵕⴰⵛ) ⴷⴻⴳ ⵓⴽⴰⵜⴰⵔ ⵏ ⵜⴻⵔⴽⴻⴼⵜ (ⵇⴰⴼⵉⵍⴰ) ⵏ ⵜⴻⵎⵙⴻⵜⵍⴻⵍⵜ ⴰⵢ ⴷ-ⵉⴳⴰ ⵡⴻⵖⵍⵉⴼ ⵏ ⵜⵖⴰⵡⵙⵉⵡⵉⵏ ⵏ ⴷⴷⵉⵏ ⵉ ⵍⵎⴻⵏⴷ ⵏ ⵡⴰⵢⵢⵓⵔ ⵏ ⵔⴻⵎⴹⴰⵏ.
ⴰⵏⴻⵎⵀⴰⵍ ⵏ ⵓⵡⴻⵀⵀⵉ ⵏ ⴷⴷⵉⵏ ⴷ ⵓⵙⵙⴻⵍⵎⴻⴷ ⵏ ⵍⴻⵇⵔⴰⵏ ⴷⴻⴳ ⵡⴻⵖⵍⵉⴼ ⵏ ⵜⵖⴰⵡⵙⵉⵡⵉⵏ ⵏ ⴷⴷⵉⵏ, ⵎⴰⵙⵙ ⵢⵧⵓⵏⵙⵉ, ⵢⴻⵏⵏⴰ-ⴷ, ⴷⴻⴳ ⵢⵉⵊⵉⴼⴻⵕ ⵏ ⵜⵓⵣⵣⵢⴰ ⵏ ⵜⴻⵔⴽⴻⴼⵜ ⵜⴰⵖⴻⵍⵏⴰⵡⵜ ⴰⵢ ⵉⵇⴻⵍⵄⴻⵏ ⵙⴻⴳ ⵡⴻⵅⵅⴰⵎ ⵏ ⵍⵉⵎⴰⵎ (ⴷⴻⴳ ⵎⵓⵃⴻⵎⵎⴰⴷⴻⵢⵢⴰ) ⵖⴻⵔ ⵢⴻⵙⴱⵉⵟⴰⵔⴻⵏ-ⴰ, ⴷⴰⴽⴽⴻⵏ ⵛⵛⵖⴻⵍ-ⴰ ⴷ ⴰⵃⵔⵉⵛ ⵙⴻⴳ ⵜⵔⴻⴽⴼⵉⵏ ⵏ ⵜⴻⵎⵙⴻⵜⵍⴻⵍⵜ (ⵜⴰⴹⴰⵎⵓⵏ) ⵉ ⵍⵎⴻⵏⴷ ⵏ « ⵜⵓⵥⵓⵜ ⵏ ⵡⴰⵣⴰⵍⴻⵏ ⵏ ⵜⴻⵎⵙⴻⵜⵍⴻⵍⵜ ⴷ ⵡⴻⴱⴷⴰⴷ ⵏ ⵜⵎⴻⵜⵜⵉ ⵜⴰⴷⵣⴰⵢⵔⵉⵜ ⵖⴻⵔ ⵢⵉⴷⵉⵙ ⵏ ⵡⵉⴷ ⵢⴻⵃⵡⴰⵊⴻⵏ » ⴷⴻⴳ ⵡⴰⵢⵢⵓⵔ ⵏ ⵔⴻⵎⴹⴰⵏ.
ⵉⴽⴰⵔⴰⴼⴻⵏ-ⵏⵏⵉ ⴰⵢ ⵢⴻⵜⵜⵓⵏⴻⴼⴽⴻⵏ ⵉ ⵢⵉⵎⵓⴹⵉⵏⴻⵏ ⵍⵍⴰⵏ ⴷⴻⴳ-ⵙⴻⵏ ⵢⵉⴼⴰⵔⵉⵙⴻⵏ ⵏ ⵍⵍⵙⴰⵙ ⴰⵢ ⵉⵏⴻⴼⵄⴻⵏ ⴰⵎⵓⴹⵉⵏ ⴰⵎ ⵡⴰⵎⴰⵏ, ⵉⵥⴻⵎ, ⵜⵉⴱⴻⵙⵙⴰⵙⵉⵏ ⵏ ⵢⵉⵍⵓⴼⴰⵏⴻⵏ, ⵉⵍⴻⵍⵍⴰⵛ, ⵉⴷⵍⵉⵙⴻⵏ ⴷ ⵢⵉⴼⴰⵔⵉⵙⴻⵏ ⵏⵉⴹⴻⵏ.
ⵢⴻⵛⴽⴻⵔⴹ-ⴷ, ⴷⴻⴳ ⵜⴻⵎⵙⴰⵍⵜ-ⴰ, ⵎⴰⵙⵙ ⵢⵧⵓⵏⵙⵉ, ⵕⵕⵓⵃ-ⵏⵏⵉ ⵏ ⵜⴻⵎⵙⴻⵜⵍⴻⵍⵜ ⵏ ⵡⴰⵢⵜ ⵍⵅⵉⵔ ⴷⴻⴳ ⵜⵎⴻⵙⴳⵉⴷⵉⵡⵉⵏ ⵏ 48 ⵏ ⵜⵡⵉⵍⴰⵢⵉⵏ ⵏ ⵜⵎⵓⵔⵜ.
ⴰⵎⴻⵥⵍⵓ (ⵎⴰⵚⵍⴰⵃⴰ) ⵏ ⵓⵛⴻⵍⵍⴻⵃ ⵏ ⵢⵉⴳⴻⵔⴷⴰⵏ ⴷⴻⴳ ⵡⴻⵙⴱⵉⵟⴰⵔ ⵏ ⵎⵓⵙⵜⴰⵒⵀⴰ-ⵒⴰⵛⵀⴰ ⴰⵢⴷⴻⴳ ⵍⵍⴰⵏ 72 ⵏ ⵡⵓⵙⵓⵜⴻⵏ ⴷ ⵏⴻⵜⵜⴰ ⴰⵢ ⴷ ⴰⵎⴽⴰⵏ ⴰⵎⴻⵣⵡⴰⵔⵓ ⵡⵓⵖⵓⵔ ⵜⴻⵔⵣⴰ ⵜⴻⵖⵍⴰⵎⵜ. ⴰⵎⴻⵥⵍⵓ-ⴰ ⵍⵍⴰⵏ ⴷⴻⴳ-ⵙ ⵢⵉⴳⴻⵔⴷⴰⵏ ⵢⴻⵄⴰⵏ ⴳⴰⵔ 3 ⴷ 14 ⵏ ⵢⵉⵙⴻⴳⴳⴰⵙⴻⵏ ⴰⵢ ⵢⴻⵙⵄⴰⵏ ⵜⵉⵣⵣⴻⵍⴳⵉⵡⵉⵏ ⴰⵢⵢⴻⵙ ⴷ-ⵍⵓⵍⴻⵏ ⵏⴻⵖ ⵏⴹⴻⵔⵔⴻⵏ ⵙⴻⴳ ⵢⵉⵙⴻⵀⵡⴰ (ⵃⴰⵡⴰⴷⵉⵜ) ⴷⴻⴳ ⵡⴻⵅⵅⴰⵎ.
