Asebter amenzawi

Areḍḍal s ḍḍmana: ugar n 251 n yimelyaṛen n yidinaṛen ay yettwammeṛkan seg Yebrir yezrin

LEZZAYER TAMANEɣT– Ugar n 251 n yimelyaṛen n yidinaṛen ay yettwammeṛkan seg wasmi ay yebda uṛeḍḍal s ḍḍmana deg Yebrir yezrin i lmend n unnerni adamsan ɣef wakken ay aɣ-d-txebber yiwet n teɣbalut (maṣdar) tadrimant.

Amur ameqran seg yimmeṛkiyen-a yella-d deg tbankiwin d tkebbaniyin n usenkid (ḍaman), yernu ala 1% ay d-yellan deg lxeznat n twilayin, ɣef wakken ay aɣ-d-tenna teɣbalut-a.

Yenna-d umasay-a (mas’ul) ay aɣ-d-ixebbren dakken yebda ummeṛki s wenya (watira) yelhan yernu, lemmer d lebɣi, ad telhu tecrawt seg wayyuren ay d-yetteddun.

Yebda-d ureḍḍal aɣelnaw i unnerni adamsan deg 17 Yebrir yernu ad teqqim tallit n ummeṛki 6 n wayyuren (gar Yebrir d Tubeṛ n 2016).

Ḍḍmanat-a sɛant sin n yefmiḍiyen (nisba) n lfayda ɣef leḥsab n tallit n tririt n ureḍḍal: ḍḍmanat n 3 n yiseggasen sɛant lfayda n 5%, ma d tid n 5 n yiseggasen sɛant lfayda n 5,75%.

Ḍḍmanat-a llant swant 50.000 n yidinaṛen mi bdant ttnuzunt deg wayyur n Yebrir, sakkin rnan-d ḍḍmanat n 10.000 n yidinaṛen i wusligen (xawaṣṣ) d ḍḍmanat n umelyun n yidinaṛen i yemsaɣen imeqranen.