ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵣⴰⵍ ⵏ 80.000 ⵏ ⵢⵉⵎⴻⵙⵏⴻⴱⴷⴰ ⴰⵢ ⴷ-ⵢⴻⵔⵣⴰⵏ ⵖⴻⴼ ⵜⴻⴼⵜⵉⵙⵉⵏ ⵏ ⵎⴻⵙⵜⵖⴰⵏⴻⵎ

ⵎⴻⵙⵜⵖⴰⵏⴻⵎ – ⴰⵣⴰⵍ ⵏ 80.000 ⵏ ⵢⵉⵎⴻⵙⵏⴻⴱⴷⴰ ⴰⵢ ⴷ-ⵢⴻⵔⵣⴰⵏ ⵖⴻⴼ ⵜⴻⴼⵜⵉⵙⵉⵏ (ⵛⴰⵡⴰⵟⵉ’) ⵏ ⵜⵡⵉⵍⴰⵢⵜ ⵏ ⵎⴻⵙⵜⵖⴰⵏⴻⵎ ⵙⴻⴳ 1ⵓ ⵖⴻⵔ 24 ⵢⵓⵏⵢⵓ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵜⴻⵏⵏⴰ, ⴰⵙⵙ ⵏ ⵙⵙⴻⴱⵜ, ⵜⵎⴻⵀⵍⴰ (ⵎⵓⴷⵉⵔⵉⵢⵢⴰ) ⵏ ⵓⵃⵓⴷⴷⵓ ⴰⵖⴰⵔⵉⵎ ⵏ ⵜⵡⵉⵍⴰⵢⵜ-ⴰ.

ⵔⵣⴰⵏ-ⴷ ⵢⵉⵎⴻⵙⵏⴻⴱⴷⴰ-ⴰ (ⵎⵓⵚⵟⴰⴼⵉⵏ) ⵖⴻⴼ 24 ⵏ ⵜⴻⴼⵜⵉⵙⵉⵏ ⴰⵏⴷⴰ ⴰⵢ ⵢⴻⵜⵜⵡⴰⵄⴻⵎⵎⴻⴷ ⵓⵄⵓⵎⵓ, ⵢⴻⵔⵏⵓ 3 ⵙⴻⴳ ⵜⴻⴼⵜⵉⵙⵉⵏ-ⴰ ⴷ ⵜⵉⵎⴰⵢⵏⵓⵜⵉⵏ (ⵜⵉⴼⵜⵉⵙⵉⵏ ⵏ ⴱⴻⵃⵃⴰⵕⴰ ⵜⵉⵙ 2 ⴷ ⵜⵉⵙ 3 ⴷ ⵓⵙⴰⴳⴻⵏ ⴰⵎⴻⵥⵢⴰⵏ ⵏ ⵙⵉⴷⵉ ⵍⴻⵅⴹⴻⵔ).

ⵜⵉⴼⵜⵉⵙⵉⵏ ⵏ ⵜⵡⵉⵍⴰⵢⵜ-ⴰ ⵊⴻⴱⴱⴷⴻⵏⵜ-ⴷ ⵎⴻⴷⴷⴻⵏ ⵍⴰⴷⵖⴰ ⴷⴻⴳ ⵜⴳⴰⵔⴰ ⵏ ⴷⴷⵓⵕⵜ. ⴰⵎⵓⵔ ⴰⵎⴻⵇⵔⴰⵏ ⵙⴻⴳ ⵡⵉⴷ ⴰⵢ ⴷ-ⵉⵔⴻⵣⵣⵓⵏ ⴼⴻⵍⵍ-ⴰⵙⴻⵏⵜ ⴷ ⵉⵍⴻⵎⵥⵉⵢⴻⵏ ⵢⴻⵔⵏⵓ ⵢⵉⵡⴻⵜ ⵙⴻⴳ ⵜⴻⴼⵜⵉⵙⵉⵏ ⵎⴻⵛⵀⵓⵕⴻⵏ ⴷ ⵜⵉⵏ ⵏ « ⵙⴰⴱⵍⴻⵜⵜⴻⵙ » ⵏ ⵜⵖⵉⵡⴰⵏⵜ ⵏ ⵎⴰⵣⴰⵖⵔⴰⵏ.

ⵜⵉⴳⴻⵔⵎⴰⵏⵉⵏ (ⵜⴰⴷⴰⵅⵅⵓⵍⴰⵜ) ⵏ ⵓⵃⵓⴷⴷⵓ ⴰⵖⴰⵔⵉⵎ ⵙⵙⴰⵡⴹⴻⵏⵜ ⵖⴻⵔ ⵓⵙⵙⵓⴽⴽⴻⵙ ⵏ 28 ⵏ ⵢⴻⵎⴷⴰⵏⴻⵏ ⵙⴻⴳ ⵡⴻⵖⵔⴰⵇ, ⴳⴰⵔ-ⴰⵙⴻⵏ 11 ⵏ ⵢⵉⵄⴻⵡⵡⴰⵎⴻⵏ ⵙⵙⵓⴽⴽⵙⴻⵏ-ⵜⴻⵏ-ⵉⴷ ⴷⴻⴳ ⵜⴻⴼⵜⵉⵙⵜ, ⵎⴰ ⴷ 3 ⵏ ⵡⵉⵢⴰⴹ ⵡⵡⵉⵏ-ⵜⴻⵏ ⵖⴻⵔ ⵢⵉⵎⵓⴽⴰⵏ ⵏ ⵓⴷⴰⵡⵉ. ⵓⵍⴰ ⴷ ⵢⵉⵡⴻⵏ ⵏ ⵓⵄⴻⵡⵡⴰⵎ ⵓⵔ ⵢⴻⵎⵎⵓⵜ ⴷⴻⴳ ⵜⴰⵍⵍⵉⵜ-ⴰ.

ⵢⴻⵙⵙⴻⴱⴳⴻⵙ ⵓⵃⵓⴷⴷⵓ ⴰⵖⴰⵔⵉⵎ ⵏ ⵎⴻⵙⵜⵖⴰⵏⴻⵎ, ⵉ ⵍⵎⴻⵏⴷ ⵏ ⵜⵙⴻⵎⵀⵓⵢⵜ-ⴰ ⵏ ⵢⵉⵎⵓⵔⴰⵙ ⵏ ⵓⵏⴻⴱⴷⵓ, ⵓⴳⴰⵔ ⵏ 400 ⵏ ⵢⵉⵎⴻⴳⴳⵉⵢⴻⵏ (ⴰⵄⵡⴰⵏ), ⴳⴰⵔ-ⴰⵙⴻⵏ 370 ⵏ ⵢⵉⵅⴻⴷⴷⴰⵎⴻⵏ ⵉⵙⴻⵎⵀⵓⵢⴰⵏⴻⵏ ⴷ 35 ⵏ ⵢⵉⵎⴻⵏⵟⴰⴱⴻⵏ (ⵖⴰⵡⵡⴰⵚⵉⵏ) ⵉⵙⴰⴷⵓⵔⴰⵏⴻⵏ, ⴰⵎ ⵡⴰⴽⴽⴻⵏ ⴰⵢ ⴷ-ⵉⴳⴰ ⵜⵉⴳⴳⴻⵜ ⵜⴰⵡⵍⴰⵍⵜ ⵜⴰⵎⴰⵢⵏⵓⵜ ⴷⴻⴳ ⵡⴰⴷⴰⴼ ⵏ ⵓⵙⴰⴳⴻⵏ ⵏ ⵙⴰⵍⴰⵎⴰⵏⴷⵔⴻ.

ⵔⵣⴰⵏ-ⴷ ⵖⴻⴼ ⵜⵡⵉⵍⴰⵢⵜ ⵏ ⵎⴻⵙⵜⵖⴰⵏⴻⵎ ⵓⴳⴰⵔ ⵏ 10 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵎⴻⵙⵏⴻⴱⴷⴰ ⴷⴻⴳ ⵜⵙⴻⵎⵀⵓⵢⵜ ⵏ ⵢⵉⵎⵓⵔⴰⵙ ⵢⴻⵣⵔⵉⵏ. ⴷⴻⴳ ⵜⴰⵍⵍⵉⵜ-ⵏⵏⵉ ⴷⴰⵖ, ⵎⵎⵓⵜⴻⵏ 19 ⵏ ⵎⴻⴷⴷⴻⵏ ⵙ ⵡⴻⵖⵔⴰⵇ, ⴳⴰⵔ-ⴰⵙⴻⵏ 13 ⵏ ⵎⴻⴷⴷⴻⵏ ⴰⵢ ⵢⴻⵍⵍⴰⵏ ⵜⵜⵄⵓⵎⵓⵏ ⴷⴻⴳ ⵜⴻⴼⵜⵉⵙⵉⵏ ⴰⵢⴷⴻⴳ ⵓⵔ ⵢⴻⵜⵜⵡⴰⵄⴻⵎⵎⴻⴷ ⵓⵄⵓⵎⵓ, ⵎⴰ ⴷ 6 ⵏⵉⴹⴻⵏ ⵖⴻⵔⵇⴻⵏ ⴷⴻⴳ ⵡⴰⴽⵓⴷⴻⵏ ⴰⵢⴷⴻⴳ ⵓⵔ ⵜⴻⵍⵍⵉ ⵜⵄⴻⵙⵙⴰⵙⵜ.