ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⵛⴰⵔ ⵛⵛⵉⵏⵡⴰ ⵜⵉⵎⴻⵥⴷⵉⵜ-ⵏⵏⴻⵙ ⵜⴰⵎⴰⵢⵏⵓⵜ ⵏ « ⵜⵉⴷⴷⵉⵜ ⵜⴰⵖⴻⵣⴼⴰⵏⵜ 7 »

ⵒⵉⴽⵉⵏ – ⵜⵛⴰⵔ ⵛⵛⵉⵏⵡⴰ, ⴰⵙⵙ ⵏ ⵙⵙⴻⴱⵜ, ⵜⵉⵎⴻⵥⴷⵉⵜ-ⵏⵏⴻⵙ (ⵚⴰⵔⵓⵅ) ⵜⴰⵎⴻⵣⵡⴰⵔⵓⵜ ⵏ « ⵜⵉⴷⴷⵉⵜ ⵜⴰⵖⴻⵣⴼⴰⵏⵜ ⵜⵉⵙ 7 » ⵙⴻⴳ ⵓⵣⴰⴷⵓⵔ-ⵏⵏⴻⵙ ⵏ ⵓⵛⵉⵔⵉ ⵏ ⵡⴻⵏⵛⵀⴰⵏⴳ (ⴷⴻⴳ ⵡⴻⵏⵥⵓⵍ), ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⵏⴻⴳⴳⴰ (ⵡⴰⴽⴰⵍⴰ) ⵜⵓⵏⵚⵉⴱⵜ ⵜⴰⵛⵉⵏⵡⴰⵜ ⵏ ⵅⵉⵏⵀⵓⴰ.

ⵜⵉⵎⴻⵥⴷⵉⵜ-ⴰ ⵏ ⵜⵙⵓⵜⴰ ⵜⴰⵎⴰⵢⵏⵓⵜ ⵜⴻⵙⵄⴰ ⵙⵉⵏ ⵏ ⵡⴰⵏⵏⴰⴳⴻⵏ, ⵢⴻⵔⵏⵓ ⴷ ⵏⴻⵜⵜⴰⵜ ⴰⵔⴰ ⵢⵓⵖⴰⵍⴻⵏ ⴷ ⵜⴰⵎⵛⵉⵔⵜ ⵜⴰⴳⴻⵊⴷⴰⵏⵜ ⵜⴰⵎⴰⵢⵏⵓⵜ ⵏ ⵢⵉⴳⴻⵏⵙⴰⵜⴻⵏ (ⴰⵇⵎⴰⵔ ⵚⵉⵏⴰⵄⵉⵢⵢⴰ) ⵉⵛⵉⵏⵡⴰⵜⴻⵏ. ⵜⴻⵣⵎⴻⵔ ⵜⵎⴻⵥⴷⵉⵜ-ⴰ ⴰⴷ ⵜⴻⵔⴼⴻⴷ ⵜⵜⴻⵄⴱⴻⵢⵢⴰ ⵏ 13,5 ⵏ ⵜⵜⴰⵡⵉⵍ ⵢⴻⵔⵏⵓ ⴰⵢⴰ ⵢⵓⴳⴰⵔ ⵙ ⵜⵉⴽⴽⴻⵍⵜ ⴷ ⵡⴻⵣⴳⴻⵏ ⴰⵢⴻⵏ ⴰⵢ ⵜⴻⵍⵍⴰ ⵜⵔⴻⴼⴼⴻⴷ-ⴷ ⵜⵎⴻⵥⴷⵉⵜ ⵏ ⵜⵉⴷⴷⵉⵜ ⵜⴰⵖⴻⵣⴼⴰⵏⵜ ⴰⵢ ⵢⴻⵍⵍⴰⵏ ⵓⵇⴱⴻⵍ-ⵉⵙ.

« ⵔⵔⴱⴻⵃ ⵏ ⵓⵛⵉⵔⵉ ⵏ ⵜⵎⴻⵥⴷⵉⵜ ⵏ ⵜⵉⴷⴷⵉⵜ ⵜⴰⵖⴻⵣⴼⴰⵏⵜ 7 ⴰⴷ ⵢⴻⵔⵏⵓ ⴷⴻⴳ ⵜⵣⴻⵎⵎⴰⵔ ⵏ ⵛⵛⵉⵏⵡⴰ ⴷⴻⴳ ⵜⴰⵍⵍⵓⵏⵜ, ⵢⴻⵔⵏⵓ ⴰⴷ ⵢⴻⴵⴵ ⵜⴰⵎⵓⵔⵜ-ⴰ ⴰⴷ ⵜⴻⵙⵄⵓ ⵜⵜⴰⵡⵉⵍ ⵉⴳⴻⵔⵔⵣⴻⵏ ⴰⴽⴽⴻⵏ ⴰⴷ ⴷ-ⵜⵃⴻⵜⵜⴻⵎ ⵉⵎⴰⵏ-ⵏⵏⴻⵙ ⴷⴻⴳ ⵜⴰⵍⵍⵓⵏⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵡⵉⵏ ⴰⵢ ⴷ-ⵉⴳⴰⵏ ⵜⵉⵎⴻⵥⴷⵉⵜ-ⴰ ⵉ ⵅⵉⵏⵀⵓⴰ, ⵎⴰ ⵣⵀⵧⵏⴳⵀⵓⵉ.

ⵜⵉⵎⴻⵥⴷⵉⵜ-ⴰ ⵜⴻⵡⵡⵉ ⵢⵉⴷ-ⵙ ⴰⵣⴻⴳⵔⵉⵔ ⵢⴻⵔⵏⵓ ⴰⴷ ⴷ-ⵢⵓⵖⴰⵍ ⵖⴻⵔ ⵡⴰⴽⴰⵍ ⴰⵙⵙ ⵏ ⵍⵃⴻⴷⴷ. ⴰⵣⴻⴳⵔⵉⵔ-ⴰ ⴰⴷ ⴷ-ⵢⴻⵔⵙ ⴷⴻⴳ ⵓⵏⴻⵥⵔⵓⴼ (ⵚⴰⵃⵔⴰ’) ⵏ ⵎⵓⵏⴳⵓⵍⵢⴰ ⵜⴰⴳⴻⵏⵙⵉⵜ ⴷⴻⴼⴼⵉⵔ ⵎⴰ ⵢⴻⵣⵣⵉ 13 ⵏ ⵜⵉⴽⴽⴰⵍ ⵖⴻⴼ ⵡⴰⴽⴰⵍ.

ⵢⴻⵍⵍⴰ-ⴷ ⵓⵛⵉⵔⵉ-ⴰ ⵉ ⵍⵎⴻⵏⴷ ⵏ ⵡⴻⵔⵥⴰⵎ ⵏ ⵡⴰⵎⵎⴰⵙ ⵏ ⵓⵛⵉⵔⵉ ⴰⵎⴰⵢⵏⵓ ⵏ ⵡⴻⵏⵛⵀⴰⵏⴳ ⴷⴻⴳ ⵜⵏⴻⴱⴹⵉⵜ (ⵎⵓⵇⴰⵟⴰⵄⴰ) ⵏ ⵀⴰⵉⵏⴰⵏ. ⴰⵎⵎⴰⵙ-ⴰ ⵉⴼⵓⴽ ⵙ ⵍⴻⴱⵏⵉ ⴷⴻⴳ 2014 ⵢⴻⵔⵏⵓ ⴷ ⵏⴻⵜⵜⴰ ⴰⵢ ⴷ ⴰⵎⵎⴰⵙ ⵏ ⵓⵛⵉⵔⵉ ⵡⵉⵙ 4 ⴰⵢ ⵜⴻⵙⵄⴰ ⵛⵛⵉⵏⵡⴰ. ⵙⴻⴳ-ⵉⵏ ⴰⵢ ⵍⴰ ⵜⴻⵙⵙⴻⴼⵔⴰⵢ ⵜⵎⵓⵔⵜ-ⴰ ⴰⴷ ⵜⴰⵣⴻⵏ ⵜⵉⵎⴻⵥⴷⵉⵜ-ⵏⵏⴻⵙ ⵜⴰⵅⴰⵜⴰⵔⵜ ⴰⴽⴽ, « ⵜⵉⴷⴷⵉⵜ ⵜⴰⵖⴻⵣⴼⴰⵏⵜ ⵜⵉⵙ 5 » ⴷⴻⴳ 2016, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵢⵉⵡⴻⵏ ⵏ ⵓⵎⴰⵙⴰⵢ (ⵎⴰⵙ’ⵓⵍ) ⵏ ⵡⴰⵀⵉⵍ ⴰⵍⵍⵓⵏⴰⵏ ⵉ ⵅⵉⵏⵀⵓⴰ.

ⵜⵓⵣⴻⵏ ⵛⵛⵉⵏⵡⴰ ⴰⵎⴷⴰⵏ-ⵏⵏⴻⵙ ⴰⵎⴻⵣⵡⴰⵔⵓ ⵖⴻⵔ ⵜⴰⵍⵍⵓⵏⵜ ⴷⴻⴳ 2003, ⵢⴻⵔⵏⵓ ⵍⴰ ⵜⴻⵙⵙⴰⵔⴰⵎ ⴰⴷ ⵜⴻⵔⵥⴻⵎ ⵜⴰⵖⵙⴻⵔⵜ-ⵏⴻⵙ ⵜⴰⵍⵍⵓⵏⴰⵏⵜ ⴷⴻⴳ ⵜⵉⵣⵉ ⵏ 2022, ⵖⴻⴼ ⵍⴻⵃⵙⴰⴱ ⵏ ⵅⵉⵏⵀⵓⴰ.

ⵍⴰ ⵜⴻⵙⵙⴻⴼⵔⴰⵢ ⵛⵛⵉⵡⴰ ⴰⴷ ⴷ-ⵜⴻⵇⴹⴻⵄ ⴰⵢⴻⵏ ⴰⵢ ⵜⵜ-ⵉⴼⴰⵜⴻⵏ ⴷⴻⴳ ⵜⴻⵙⵏⴰⵜⵡⵉⵍⵜ (ⵜⵉⴽⵏⵓⵍⵓⴵⵢⴰ) ⵜⴰⵍⵍⵓⵏⴰⵏⵜ ⵢⴻⵔⵏⵓ ⴰⴷ ⴷ-ⵜⴻⵇⴹⴻⵄ ⵉⵡⴰⵏⴰⴽⴻⵏ ⵢⴻⴷⴷⵓⴽⴽⵍⴻⵏ ⴷ ⵜⵓⵕⵓⴼⵜ, ⴰⵎ ⵡⴰⴽⴽⴻⵏ ⴰⵢ ⵜⴻⴱⵖⴰ ⴰⴷ ⴷ-ⵜⴻⵇⴹⴻⵄ ⵍⵀⴻⵏⴷ ⴰⵢ ⵢⵓⵖⴰⵍⴻⵏ, ⴷⴻⴳ 2014, ⴷ ⵜⴰⵎⵓⵔⵜ ⵜⴰⵙⵢⴰⵡⵉⵜ ⵜⴰⵎⴻⵣⵡⴰⵔⵓⵜ ⴰⵢ ⵢⵓⵣⵏⴻⵏ ⵜⴰⵙⴻⵏⵇⴰⴷⵜ ⴰⵢ ⵍⴰ ⵢⴻⵜⵜⴻⵣⵣⵉⵏ ⵖⴻⴼ ⵡⴻⵎⵜⵉⵡⴻⴳ ⵏ ⵎⴻⵖⵔⴻⵙ.