Asebter amenzawi

Tcar Ccinwa timeẓdit-nnes tamaynut n « Tiddit Taɣezfant 7 »

PIKIN – Tcar Ccinwa, ass n ssebt, timeẓdit-nnes (ṣarux) tamezwarut n « Tiddit Taɣezfant tis 7 » seg uzadur-nnes n uciri n Wenchang (deg wenẓul), ɣef wakken ay d-tenna tnegga (wakala) tunṣibt tacinwat n Xinhua.

Timeẓdit-a n tsuta tamaynut tesɛa sin n wannagen, yernu d nettat ara yuɣalen d tamcirt tagejdant tamaynut n yigensaten (aqmar ṣinaɛiyya) icinwaten. Tezmer tmeẓdit-a ad terfed tteɛbeyya n 13,5 n ttawil yernu aya yugar s tikkelt d wezgen ayen ay tella treffed-d tmeẓdit n Tiddit Taɣezfant ay yellan uqbel-is.

« Rrbeḥ n uciri n tmeẓdit n Tiddit Taɣezfant 7 ad yernu deg tzemmar n Ccinwa deg tallunt, yernu ad yeǧǧ tamurt-a ad tesɛu ttawil igerrzen akken ad d-tḥettem iman-nnes deg tallunt », ɣef wakken ay d-yenna win ay d-igan timeẓdit-a i Xinhua, Ma Zhonghui.

Timeẓdit-a tewwi yid-s azegrir yernu ad d-yuɣal ɣer Wakal ass n lḥedd. Azegrir-a ad d-yers deg uneẓruf (ṣaḥra’) n Mungulya Tagensit deffir ma yezzi 13 n tikkal ɣef Wakal.

Yella-d uciri-a i lmend n werẓam n wammas n uciri amaynu n Wenchang deg tnebḍit (muqaṭaɛa) n Hainan. Ammas-a ifuk s lebni deg 2014 yernu d netta ay d ammas n uciri wis 4 ay tesɛa Ccinwa. Seg-in ay la tessefray tmurt-a ad tazen timeẓdit-nnes taxatart akk, « Tiddit Taɣezfant tis 5 » deg 2016, ɣef wakken ay d-yenna yiwen n umasay (mas’ul) n wahil allunan i Xinhua.

Tuzen Ccinwa amdan-nnes amezwaru ɣer tallunt deg 2003, yernu la tessaram ad terẓem taɣsert-nes tallunant deg tizi n 2022, ɣef leḥsab n Xinhua.

La tessefray Cciwa ad d-teqḍeɛ ayen ay tt-ifaten deg tesnatwilt (tiknuluǧya) tallunant yernu ad d-teqḍeɛ Iwanaken Yeddukklen d Tuṛuft, am wakken ay tebɣa ad d-teqḍeɛ Lhend ay yuɣalen, deg 2014, d tamurt tasyawit tamezwarut ay yuznen tasenqadt ay la yettezzin ɣef wemtiweg n Meɣres.