ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵍⴰ ⵜⴻⵙⵙⴻⴼⵔⴰⵢ ⵙⵧⵏⴰⵜⵔⴰⵛⵀ ⴰⴷ ⵜⴻⵔⵏⵓ ⴰⴼⴰⵔⴻⵙ ⵏ ⵜⵎⴻⵔⵖⴰ ⵙⴻⴳ 2016 ⴷ ⴰⵙⴰⵡⴻⵏ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ– ⴰⴷ ⵢⴻⵔⵏⵓ ⵓⴼⴰⵔⴻⵙ (ⵉⵏⵜⴰⴵ) ⵏ ⵜⵎⴻⵔⵖⴰ ⵏ ⵜⴻⴳⵔⴰⵡⵜ ⵏ ⵙⵧⵏⴰⵜⵔⴰⵛⵀ ⵙⴻⴳ 2016 ⴷ ⴰⵙⴰⵡⴻⵏ, ⴷⴻⴼⴼⵉⵔ ⵎⴰ ⵢⴻⵏⵇⴻⵙ ⵓⴼⴰⵔⴻⵙ ⵏ ⵜⵎⴻⵔⵖⴰ ⴰⵛⵃⴰⵍ ⵏ ⵢⵉⵙⴻⴳⴳⴰⵙⴻⵏ ⴰⵢⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⵓⵙⴻⵍⵡⴰⵢ-ⴰⵏⴻⵎⵀⴰⵍ ⴰⵎⴰⵜⵓ ⵏ ⵜⴻⴳⵔⴰⵡⵜ-ⴰ, ⴰⵎⵉⵏⴻ ⵎⴰⵣⵧⵓⵣⵉ, ⴰⵙⵙ ⵏ ⵍⵃⴻⴷⴷ ⴷⴻⴳ ⵍⴻⵣⵣⴰⵢⴻⵔ, ⴷⴻⴳ ⵢⵉⵡⴻⵏ ⵏ ⵓⵙⴰⵔⴰⴳ ⵏ ⵜⵖⴻⵎⵙⴰ.

« ⵜⴼⵓⴽ ⵜⴰⵍⵍⵉⵜ ⵏ ⵓⴳⴻⵍⵍⴻⵍ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⵎⴰⵙⵙ ⵎⴰⵣⵧⵓⵣⵉ ⴰⵢ ⵢⴻⵍⵍⴰⵏ ⴷ ⵢⵉⵎⴰⵍⴰⵍⴻⵏ-ⵏⵏⴻⵙ (ⵎⵓⵙⴰⵄⵉⴷⵉⵏ) ⴷⴻⴳ ⵓⵙⴰⵔⴰⴳ-ⴰ ⴰⵢⴷⴻⴳ ⴰⵢ ⴷ-ⵉⵇⴻⴷⴷⴻⵎ ⵜⴰⵛⵔⴰⵡⵜ (ⵃⴰⵚⵉⵍⴰ) ⵏ ⵙⵧⵏⴰⵜⵔⴰⵛⵀ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⴷⴰⴽⴽⴻⵏ ⵜⵉⵎⴻⵔⵏⵉⵡⵜ-ⴰ ⵏ ⵓⴼⴰⵔⴻⵙ ⴰⴷ ⵜⴽⴻⵎⵎⴻⵍ ⴷⴻⴳ ⵢⵉⵙⴻⴳⴳⴰⵙⴻⵏ ⴰⵢ ⴷ-ⵢⴻⵜⵜⴻⴷⴷⵓⵏ.

ⵙ ⵡⴰⵢⴰ, ⴷⴻⴳ 2016, ⴰⴼⴰⵔⴻⵙ ⵏ ⵍⵍⵙⴰⵙ ⵏ ⵜⵎⴻⵔⵖⴰ ⴰⴷ ⵢⴻⵔⵏⵓ ⵖⴻⵔ 196 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵟⵓⵏⴻⵏ ⵏ ⵓⵒⵉⵜⵕⵓⵍ (ⴷⴻⴼⴼⵉⵔ ⵎⴰ ⵢⴻⵍⵍⴰ 191 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵟⵓⵏⴻⵏ ⴷⴻⴳ 2015).

ⵙⴻⴳ ⵢⵉⴷⵉⵙ ⵏⵉⴹⴻⵏ, ⴰⵢⴻⵏ ⴰⵔⴰ ⵢⴻⵏⵣⴻⵏ ⴰⴷ ⵢⴰⵡⴻⴹ ⵖⴻⵔ 163 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵟⵓⵏⴻⵏ, ⴳⴰⵔ-ⴰⵙⴻⵏ 108 ⵏ ⵢⵉⵎⴻⵍⵢⵓⵏⴻⵏ ⵜⵜⵡⴰⵡⴻⵀⵀⴰⵏ ⵉ ⵓⵙⵙⵉⵊⴻⵡ, 55 ⵏ ⵢⵉⵎⴻⵍⵢⵓⵏⴻⵏ ⵜⵜⵡⴰⵡⴻⵀⵀⴰⵏ ⵉ ⵙⵙⵓⵇ ⴰⵖⴻⵍⵏⴰⵡ, ⵖⴻⴼ ⵍⴻⵃⵙⴰⴱ ⵏ ⵢⵉⵙⴻⴼⴽⴰ (ⵎⵓⵄⵟⴰⵢⴰⵜ) ⴰⵢ ⴷ-ⵢⴻⵜⵜⵡⴰⵇⴻⴷⴷⵎⴻⵏ ⴷⴻⴳ ⵡⴻⵎⵢⴰⴳⴻⵔ-ⴰ ⵏ ⵜⵖⴻⵎⵙⴰ.

ⵍⴰ ⵜⴻⵙⵙⴻⴼⵔⴰⵢ ⴷⴰⵖ ⵙⵧⵏⴰⵜⵔⴰⵛⵀ ⴰⴷ ⴷ-ⵜⴰⴼ 32 ⵏ ⵢⵉⵎⵓⴽⴰⵏ ⵏ ⵓⵙⵙⴻⴽⴼⴻⵍ ⵏ ⵜⵎⴻⵔⵖⴰ ⴷⴻⴳ 2016, ⴷⴻⴳ ⵡⴰⴽⵓⴷ ⴰⵢⴷⴻⴳ ⴷⴻⴳ 2015, ⵜⵓⴼⴰ-ⴷ 23, ⴳⴰⵔ-ⴰⵙⴻⵏ 22 ⵏ ⵢⵉⵎⵓⴽⴰⵏ ⴷ ⵙⵧⵏⴰⵜⵔⴰⵛⵀ ⵙ ⵜⵉⵎⵎⴰⴷ-ⵏⵏⴻⵙ ⴰⵢ ⵜⴻⵏ-ⵉⴷ-ⵢⵓⴼⴰⵏ.

ⴷⴻⴳ 5 ⵏ ⵢⵉⵙⴻⴳⴳⴰⵙⴻⵏ ⴰⵢ ⴷ-ⵢⴻⵜⵜⴻⴷⴷⵓⵏ, ⴰⴷ ⵢⴻⵔⵏⵓ ⵓⴼⴰⵔⴻⵙ ⵏ ⵓⵒⵉⵜⵕⵓⵍ ⴰⴽⴽⴻⵏ ⴰⴷ ⵢⴰⵡⴻⴹ ⵖⴻⵔ 75 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵟⵓⵏⴻⵏ ⴷⴻⴳ 2017 ⴷ 2018, ⵙⴰⴽⴽⵉⵏ ⴰⴷ ⵢⴰⵡⴻⴹ ⵖⴻⵔ 77 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵟⵓⵏⴻⵏ ⴷⴻⴳ 2019. ⴷⴻⴳ 2020, ⴰⴷ ⴷ-ⵜⴼⴰⵔⴻⵙ ⵍⴻⵣⵣⴰⵢⴻⵔ 82 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵟⵓⵏⴻⵏ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵍⴳⴰⵣ ⴰⴳⴰⵎⴰⵏ, ⴰⴷ ⵢⴰⵡⴻⴹ ⵓⴼⴰⵔⴻⵙ ⴰⵖⴻⵍⵏⴰⵡ ⵖⴻⵔ 141,3 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ (ⵎ3) ⴷⴻⴳ 2017. ⴷⴻⴳ 2018, ⴰⴷ ⵢⴰⵡⴻⴹ ⵖⴻⵔ 143,9 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ (ⵎ3), 150 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ (ⵎ3) ⴷⴻⴳ 2019, ⴷ 165 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ ⴷⴻⴳ 2020, ⵖⴻⴼ ⵍⴻⵃⵙⴰⴱ ⵏ ⵜⴻⴼⵜⴰⵔⵜ (ⵡⴰⵜⵉⵇⴰ) ⴰⵢ ⴷ-ⵢⴻⵜⵜⵡⴰⵇⴻⴷⴷⵎⴻⵏ ⴷⴻⴳ ⵓⵙⴰⵔⴰⴳ-ⴰ ⵏ ⵜⵖⴻⵎⵙⴰ.