Asebter amenzawi

Tajmilt i Crifa, tigejdit n ccna n teqbaylit

LEZZAYER TAMANEɣT – Tella-d, ass n lḥedd tameddit, tsehṛa deg Lezzayer Tamaneɣt, i tririt n tejmilt i tnaẓurt tameṛḥumt Crifa (yewwḍen leɛfu n Ṛebbi deg 2014), yellan d tigejdit n ccna n teqbaylit.

Yella-d ubaraz-a (ḥafl) deg tzeqqa n El-Mouggar yernu yessuddes-it Udiwan Aɣelnaw n Yedles d Usselɣu deg ukatar n tsehṛiwin n Remḍan i tririt n tejmilt i yinaẓuren idzayriyen. Yella-d waya d tagnit i tcennayin am Hassiba Amrouche d Nouria akken ad rrent tajmilt i yiwen seg wudmawen imeqranen n ccna aqbayli.

Aṭas n lɣaci ay d-yusan ad nezzhen i tezlatin Nna Crifa s taɣect n Hassiba Amrouche am « A Azeṛzuṛ » d tiyaḍ.

Ma d tacennayt Nouria, ay d-yelsan taqendurt n Leqbayel, tecna-d kra seg tezlatin mechuṛen akk n Crifa, gar-asent « Bqaɛlaxir a Aqbu » d « Aman n ukeṛmus ».

Tewwi-d daɣ acewwiq d tajmilt i Crifa ay d-yeǧǧan tigemmi n ccna ayseg d-ttagmen aṭas n yinaẓuren.

Tlul Crifa deg Yilmayen (Lbuṛj Buɛṛiṛij) deg 1926 yernu isem-nnes n tidet d Ouardia Bouchemlal. Seg wasmi ay tella meẓẓiyet tḥemmel ccna.

Asmi ay tesɛa 18 n yiseggasen, tedda ɣer Lezzayer anda ay d-tefruri deg Ṛṛadyu n Lezzayer.

Deg Terga Tis Snat n ṛṛadyu (yessawalen s tmaziɣt), twekked-d Crifa aẓwar-nnes deg ccna n teqbaylit, ladɣa deg yicewwiqen ay d-ttawint tsednan.

Tacennayt-a umi semman « taɣect n tsednan », teǧǧa-d tigemmi n wugar n 1000 n tezlatin, amur ameqran deg-sent tekles-itent-id deg ṛṛadyu yernu ur d-ffiɣent deg yiḍebsiyen.

Tameṛḥumt-a ay yefkan tudert-nnes akk i ccna, tettekka deg ussiweḍ n tgemmi n ucewwiq yellan d aḥric seg yedles aqbur n Tmurt n Leqbayel.

Deg umecwaṛ-nnes aẓuran (fanni), teǧǧa-d aṭas n tezlatin mechuṛen am « A Azeṛzuṛ » d « Bqaɛlaxir a Aqbu » ay ɛawden cnan-tent aṭas n yinaẓuren niḍen. Tewweḍ Crifa leɛfu n Ṛebbi deg 2014 ɣer 88 n yiseggasen.