Asebter amenzawi

Tabatent: Tadxent tagamant i Usarir n 1u n Wamber 1954 uqbel tgara n Ɣuct

TABATENT – Iḥettet-d uwali n Tbatent, Mohamad Salamani, deg yiwet n terzi n takunt (mufaǧa’a), dakkin asarir (malɛab) n « 1u n Wamber 1954 » yessefk ad yessu d tadxent tagamant uqbel tgara n wayyur n ɣuct.

Yessefk ad d-yewjed wenrar-a uqbel ma bdan-d yemsizewren n tcirḍart akken ad yemmager tiɣlamin n Tbatent, ladɣa taɣlamt n CA Tabatent ay yulin ɣer Temɣunt 1ut n Mobilis, ɣef wakken ay iweṣṣa uwali imasayen (mas’ulin) ay d-yelhan s ccɣel-a.

Deg terzi-nnes, sfehmen-as-d i uwali lecɣal ay tebda seg melmi kan yiwet n teṛmist tanagdudt (ɛumumiyya) ay yemmuzzgen deg waya.

Terra tmara ad d-yili ccɣel-a akken ad zemrent teɣlamin tidiganin (maḥalliyya) ad urarent deg tegnatin igerrzen, ɣef wakken ay d-yenna unemhal n yilemẓiyen d waddal, am wakken ay d-ixebber dakken asuddis (murakkab) addalan n Tbatent yeḍḍef-d ttawil i wethelli deg tedxent yernu yesqam-d waya 60 n yimelyunen n yidinaṛen.

Mi yerza uneɣlaf n yilemẓiyen n waddal ɣef wenrar-a seg melmi kan, yesla i yiɣeblan n yimasayen n usuddis d yimazanen (nuwwab), yernu nnan-as-d yineggura-a dakken tiɣlamin tidiganin ṛwant lḥif ɣef lǧal n wexṣar ay yexṣer wenrar-a.