Asebter amenzawi

Ɛin Ddefla: lebni n waṭas n temṣukin yeqqnen ɣer weḥric n yilemẓiyen d waddal

ƐIN DDEFLA – Yenna-d, ass n letniyen, yiwen n umasay (mas’ul) n tmehla tadigant n yilemẓiyen d waddal dakken aṭas n temṣukin (hayakil) yeqqnen ɣer weḥric-a ay la bennun deg twilayt n Ɛin Ddefla.

Timṣukin-a d snat n tzeɣwin tikkaddalin ara yesɛun 500 n yimukan i yiwet. Tamezwarut ad tettwabnu deg tɣiwant n Rrwina, ma d tis snat deg Lexmis n Tmelyant. Ad yettwabnu daɣ wammas n wesgalef (markaz taǧhiz) deg tlemmast n temdint n Lexmis n Tmelyant, ɣef wakken ay d-yenna umasay-a n umeẓlu n yilemẓiyen d waddal n Ɛin Ddefla deg yijifeṛ n tfugla i tririt n tejmilt i yinaddalen n twilayt-a ay d-yefrurin s yegmaḍ-nsen yelhan.

Ad ttwabnun daɣ yisuddisen (murakkabat) addalanin uqriben deg Ɛin Sselṭan, Ɛin Ddefla d Ɛin Lecyax, am wakken ara ttwabnunt snat n tnerdabin (masabiḥ): yiwet deg Lɛeṭṭaf, ma d tayeḍ deg Rrwina, ɣef wakken ay d-yenna Mass Hamlaoui ay d-yernan dakken ad yettwabnu daɣ wegrir n yilemẓiyen (n 200 n wusuten) deg Wad Cceṛfa d wexxam n yilemẓiyen (100 n wusuten) deg temdint n Ɛin Ddefla.

« Isuddisen addalanen uqriben tturaren dduṛ d ameqran deg tmussni n yilemẓiyen uẓwiren d uɛawen-nsen ad d-frurin », ɣef wakken ay d-yenna, am wakken ay d-iwekked dakken timṣukin-a ad ilint daɣ d « iɣerban » ara iḥerzen ilemẓiyen seg yixeṣṣaren n tmetti.

S ujemmal, rran tajmilt i 50 n yinaddalen n waddalen interrasen deg tfugla-a ay yesselwi uwali n Ɛin Ddefla, Kamel Abass deg wexxam n yedles n Lamir Ɛebdelqader deg temdint n Ɛin Ddefla.