ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵢⴻⵙⵙⴻⴼⴽ ⴰⴷ ⵃⴰⴽⵕⴻⵏⵜ ⵜⴻⵕⵎⵉⵙⵉⵏ ⵏ ⵢⵉⵙⴰⴼⴰⵔⴻⵏ ⵙⵙⵓⵇ ⴰⵡⴻⵔⴷⴰⵏⵉ (ⴰⵏⴻⵖⵍⴰⴼ)
ⵄⵉⵏ ⴷⴷⴻⴼⵍⴰ – ⵢⴻⵏⵏⴰ-ⴷ ⵓⵏⴻⵖⵍⴰⴼ ⵏ ⵜⴷⴰⵡⵙⴰ (ⵚⵉⵃⵃⴰ), ⴰⴱⴷⴻⵍⵎⴰⵍⴻⴽ ⴱⵧⵓⴷⵉⴰⴼ, ⴰⵙⵙ ⵏ ⵍⴻⵜⵏⵉⵢⴻⵏ ⴷⴻⴳ ⵍⴻⵅⵎⵉⵙ ⵏ ⵜⵎⴻⵍⵢⴰⵏⵜ, ⴷⴰⴽⴽⴻⵏ ⵜⵉⵕⵎⵉⵙⵉⵏ (ⵛⴰⵔⵉⴽⴰⵜ) ⵜⵓⵙⵍⵉⴳⵉⵏ ⵏ ⵢⵉⵙⴰⴼⴰⵔⴻⵏ ⴰⵢ ⵉⵅⴻⴷⴷⵎⴻⵏ ⴷⴻⴳ ⵍⴻⵣⵣⴰⵢⴻⵔ ⵢⴻⵙⵙⴻⴼⴽ ⴰⴷ ⵃⴰⴽⵕⴻⵏⵜ ⵍⴻⵙⵡⴰⵇ ⵉⵡⴻⵔⴷⴰⵏⵉⵢⴻⵏ.
ⵎⵉ ⵢⴻⵔⵣⴰ ⵖⴻⴼ ⵍⵍⵓⵣⵉⵏ ⵜⵓⵙⵍⵉⴳⵜ ⵏ ⵓⴼⴰⵔⴻⵙ (ⵉⵏⵜⴰⴵ) ⵏ ⵢⵉⴼⴰⵔⵉⵙⴻⵏ ⵏ ⴰⵜ.ⵒⵀⴰⵔⵎⴰ, ⵢⴻⵏⵏⴰ-ⴷ ⴷⴰⴽⴽⴻⵏ ⵍⴻⵣⵣⴰⵢⴻⵔ ⵜⴻⵙⵄⴰ ⴰⴼⵎⵉⴹⵉ (ⵏⵉⵙⴱⴰ) ⵢⴻⵍⵀⴰⵏ ⵏ ⵜⴷⵓⵍⵉ ⵙ ⵢⵉⵙⴰⴼⴰⵔⴻⵏ, ⵢⴻⵔⵏⵓ ⵖⴻⴼ ⵡⴰⵢⴰ ⴰⵢ ⵢⴻⵙⵙⴻⴼⴽ ⴰⴷ ⴷ-ⵢⵉⵍⵉ ⵓⵅⴻⵎⵎⴻⵎ ⵖⴻⴼ ⵓⵙⵙⵉⴵⴻⵡ ⵏ ⵢⵉⵙⴰⴼⴰⵔⴻⵏ ⵖⴻⵔ ⵜⵎⵓⵔⴰ ⵜⵉⵡⴻⵔⴷⴰⵏⵉⵢⵉⵏ ⴷⴻⴳ ⵓⴽⴰⵜⴰⵔ ⵏ ⵜⵎⵓⴷⴻⵎⵜ ⵜⴰⴷⴰⵎⵙⴰⵏⵜ ⵜⴰⵎⴰⵢⵏⵓⵜ ⴰⵢ ⵙⴻⵎⵍⴻⵏ ⵢⵉⵎⴰⵙⴰⵢⴻⵏ ⵓⵏⵏⵉⴳⴻⵏ ⵏ ⵜⵎⵓⵔⵜ.
ⵢⴻⵏⵏⴰ-ⴷ ⵓⵏⴻⵖⵍⴰⴼ ⴷⴰⴽⴽⴻⵏ ⴰⵙⵙⵉⴵⴻⵡ ⵏ ⵢⵉⵙⴰⴼⴰⵔⴻⵏ ⴰⴷ ⴷ-ⵢⴻⵙⵙⵉⴷⴻⴼ ⵓⴳⴰⵔ ⵏ ⵢⴻⴷⵔⵉⵎⴻⵏ ⵓⵊⵀⵉⴷⴻⵏ ⵉ ⵜⵎⵓⵔⵜ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵛⴻⴷ ⵉⵎⴰⵙⴰⵢⴻⵏ (ⵎⴰⵙ’ⵓⵍⵉⵏ) ⵏ ⵜⴻⵕⵎⵉⵙⵉⵏ ⵜⵓⵙⵍⵉⴳⵉⵏ ⵏ ⵢⵉⵙⴰⴼⴰⵔⴻⵏ ⴰⴽⴽⴻⵏ ⵓⵔ ⵜⵜⴰⵔⵔⴰⵏ ⵍⵡⴻⵍⵀⴰ-ⵏⵙⴻⵏ ⴰⵍⴰ ⵖⴻⵔ ⵓⵙⵙⴻⵕⵡⵓ ⵏ ⵙⵙⵓⵇ ⴰⵖⴻⵍⵏⴰⵡ, ⵡⴰⵏⴰⴳ ⵢⴻⵙⵙⴻⴼⴽ ⴷⴰⵖ ⴰⴷ ⵅⴻⵎⵎⴻⵎⴻⵏ ⵖⴻⴼ ⵓⵙⵙⵉⴵⴻⵡ ⵖⴻⵔ ⵍⴻⵙⵡⴰⵇ ⵏ ⵜⴻⴼⵔⵉⵇⵜ ⴷ ⵜⵎⵓⵔⴰ ⵜⴰⵄⵕⴰⴱⵉⵏ ⵢⴻⵔⵏⵓ ⵓⵍⴰ ⵖⴻⵔ ⵜⵓⵕⵓⴼⵜ.
« ⵡⵉⵏ ⴰⵢ ⵢⴻⴱⵖⴰⵏ ⴰⴷ ⵢⴻⴱⴷⵓ ⴰⵙⵙⵉⴵⴻⵡ ⵏ ⵢⵉⵙⴰⴼⴰⵔⴻⵏ ⵢⴻⵙⵙⴻⴼⴽ ⴰⴷ ⵢⵉⵍⵉ ⴷ ⴰⵥⴻⴷⴷⴰⵎ ⵢⴻⵔⵏⵓ ⴰⴷ ⵉⴱⴻⴷⴷⴻⵍ ⴰⵎⴻⴽ ⵢⴻⵜⵜⵅⴻⵎⵎⵉⵎ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵉⵅⴻⴱⴱⴻⵔ ⴷⴰⴽⴽⴻⵏ ⵍⴻⵣⵣⴰⵢⴻⵔ ⵜⴻⵙⵄⴰ ⵜⵉⵕⵎⵉⵙⵉⵏ ⵜⵓⵥⵡⵉⵔⵉⵏ ⴰⵢ ⵉⵣⴻⵎⵔⴻⵏ ⴰⴷ ⵇⴰⴱⵍⴻⵏⵜ ⴰⵛⵇⵉⵔⵔⴻⵡ-ⴰ.
ⵖⴻⴼ ⵍⴻⵃⵙⴰⴱ ⵏ ⵓⵏⴻⵖⵍⴰⴼ, ⵍⴻⵣⵣⴰⵢⴻⵔ ⵜⴻⵙⵄⴰ ⵜⵉⵣⴻⵎⵎⴰⵔ ⵢⴻⵔⵏⵓ ⵢⴻⵙⵙⴻⴼⴽ ⴰⴷ ⵜⴻⴹⴹⴻⴼ ⴰⵎⴽⴰⵏ ⴰⵎⴻⵣⵡⴰⵔⵓ ⴷⴻⴳ ⵜⴻⴼⵔⵉⵇⵜ ⴷ ⵓⵎⴰⴹⴰⵍ ⴰⵄⵕⴰⴱ ⴷⴻⴳ ⵡⴻⵏⵔⴰⵔ ⵏ ⵓⴼⴰⵔⴻⵙ ⵏ ⵢⵉⵙⴰⴼⴰⵔⴻⵏ, ⴰⵎ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⴷⴰⴽⴽⴻⵏ ⴰⵡⴰⵏⴰⴽ ⵓⵔ ⵢⴻⵜⵜⵛⵓⵃⵃⵓ ⵖⴻⴼ ⵡⵓⵙⵙⵉⵙⴻⵏ (ⵎⴰⴵⵀⵓⴷⴰⵜ) ⴰⴽⴽⴻⵏ ⴰⴷ ⵉⵄⴰⵡⴻⵏ ⵡⵉⴷ ⴰⵢ ⵢⴻⴱⵖⴰⵏ ⴰⴷ ⵙⵙⵉⴵⵡⴻⵏ ⵉⵙⴰⴼⴰⵔⴻⵏ.
