Asebter amenzawi

Lbak: ad d-tili tnemselt taɣelnawt deg Yulyu i ubeddel n kra n tɣawsiwin

TIPAZA – Tenna-d tneɣlaft n ussegmi aɣelnaw, Nouria Benghebrit, ass n ttlata, deg terzi-nnes ɣef twilayt n Tipaza, dakken ad d-tili tnemselt (warca) taɣelnawt i lmend n ubeddel n kra n tɣawsiwin deg ukayad n lbak « deg wayyur-a n Yulyu ».

« La d-yettili uheyyi i ussuddes n yiwet n tnemselt taɣelnawt s wemɛawen d weɣlif n welmud imineg d unadi ussnan s yisem-nnes d acrik axatar, d yecriken inmettiyen (iǧtimaɛiyya) » i lmend n ussekyed n ttawilat n ussefrek (tasyir) n yikayaden-a i lmend n uḥezzeb i kra n wuguren, ɣef wakken ay d-tenna tneɣlaft deg yiwet n tseɣrut i tɣemsa deg tgara n yiwet n tfugla ay d-yellan deg tesɣimt n twilayt i tririt n tejmilt i yinelmaden ay d-tewwin ikayaden-nsen n weswir amenzu d welmud alemmas.

Tenna-d Massa Benghebrit, deg temsalt-a, dakken tessaweḍ, seg melmi kan, deg yiwen n wemyager aydeg tessawel d yecriken inmettiyen, ɣer yiwen n wemtawa (ittifaq) aydeg temsefham yid-sen akken ad yuɣal lbak ad yettaḍḍaf 3 n wussan deg webdil n 5 n wussan, d acu kan, ur tessaweḍ ad temsefham yid-sen ɣef kra n temsal niḍen.

«Tagrawt n uxeddim, ay d-yettwasbedden seg melmi kan, tettwakellef ad d-tessumer tifratin i weskasi (niqac) deg tnemselt-a taɣelnawt ara d-yilin uqbel wuɣal ɣer uɣerbaz », ɣef wakken ay d-tenna tneɣlaft n ussegmi aɣelnaw.