Asebter amenzawi

Tuḍḍfa n 63,4 n yiṭunen n sselɛa ixeṣren deg 6 n twilayin n wegmuḍ

TABATENT – 63,4 n yiṭunen n yifarisen n tuččit ixeṣren (s wazal n 93,1 n yimelyunen n yidinaṛen) ay yettwaḍḍfen seg wasmi ay d-yebda Remḍan deg 6 n twilayin yeqqnen ɣer tmehla (mudiriyya) tamnaḍant n tnezzut n Tbatent, ɣef wakken ay d-yenna, ass n ttlata, umasay n tmehla-a, Brahim Khidhri.

Deg tallit-nni daɣ, ufant-d teferqtin n ussefqed n twilayin n Tbatent, Um Lebwaqi, Tibeskert, Tbessa, Qsenṭina d Txencelt 658 n yimelyunen n yidinaṛen ayɣef ur d-telli tfatuṛt, am wakken ay d-ssumrent amdal n 430 n tḥuna imi ur qudrent ilugan n tnezzut (tiǧara), ɣef wakken ay d-yenna umasay-a (mas’ul).

Ugar n 173 n tferqtin n ussefqed n tɣara (ǧawda) d yimenɣi mgal wedɣal d 182 n tferqtin n ussefqed n tsemras n tnezzut ay yettwasbegsen akken ad sseḥbibrent ɣef tdawsa (ṣiḥḥa) n medden deg twilayin-a anda ay gant 34.574 n tgermanin, ɣef leḥsab n umasay-a.

Tigermanin-a ssawḍent ɣer ussuffeɣ n 7.222 n lexḍeyyat ɣef lǧal n lqella n tezdeg (996 n liḥalat), lqella n uqader n teẓɣelt n wejmaɛ n sselɛa (495 n liḥalat), assenzi n sselɛa ixeṣren (440 n liḥalat) d ussenzi n sselɛa beṛṛa i lmaḥel (335 n liḥalat) ɣef wakken ay d-yenna.

Llant-d daɣ 751 n liḥalat aydeg imawlan n tḥuna ur ǧǧin imeggiyen (aɛwan) n ussefqed ad gen ccɣel-nsen, ɣef wakken ay d-yenna unemhal amnaḍan n tnezzut.