Asebter amenzawi

Tuffɣa n Briṭanya Tameqrant seg Tdukli Tuṛufit ad tenfeɛ imenɣi aṣeḥrawi

LONDON – Yenna-d ugensas n Terni n Polisario deg London, Ali Mohamed Limam, dakken tuffɣa n Briṭanya Tameqrant seg Tdukli Tuṛufit « tezmer ad tessifses lḥeṛs ay d-yellan ass-a ɣef Meṛṛuk, yernu addud abriṭani yezmer ad yuɣal i lfayda n yimenɣi aṣeḥrawi ».

Deg yiwet n tdiwennit ay iga d udeg n « Al-Sahrawi », yenna-d Mass Limam dakken Tirni n Polisario d unabaḍ (ḥukuma) aṣeḥrawi ttqadaren ṛṛay n weɣref abriṭani deg wayen yerzan tuffɣa n tmurt-nsen seg Tdukli Tuṛufit, am wakken ay d-yerna dakken « leqwanin n Briṭanya Tameqrant ur d-mazal ad knun ddaw leqwanin n Tdukli Tuṛufit, yernu imi Briṭanya Tameqrant ur tesɛi isseftiyen deg Uneẓruf Utrim, addud n tmurt-a adennit ad yuɣal yejhed, ladɣa deg Tuddsa n Yeɣlanen Yeddukklen ».

Dɣa, deg temsalt-a, yenna-d Mass Limam dakken « addud n Briṭanya Tameqrant, ass-a, deg wayen yerzan tamsalt taṣeḥrawit d win yifen addud n tmura niḍen yesɛan tazrirt (ta’tir), maca ur yelli d addud ijehden aṭas », am wakken ay d-iwet deg weɛraḍ ay la tɛerreḍ Meṛṛuk ad tesseḍɛef addud-a.

S yisem-nnes d tamaslaḍt yezgan deg Useqqamu n Tɣellist (amn) d tegrawt n yimeddukal n Uneẓruf Utrim, tesɛa Briṭanya Tameqrant azal meɣɣren deg uxeddim adiplumati i lmend n wesdukkel n tmura timeqranin i lfayda n temsalt taṣeḥrawit, ladɣa tid yesɛan amkan n umaslaḍ yezgan deg Useqqamu n Tɣellist, ɣef wakken ay d-yenna umasay-a (mas’ul). Addud n Briṭanya Tameqrant, deg yiseggasen-a ineggura, yedda mliḥ ɣer sdat ɣef leḥsab n win n tmura niḍen n Useqqamu n Tɣellist, ɣef wakken ay d-yerna.

Addud unṣib n Briṭanya Tameqrant yella-d « s dduṛ ay turar tegrawt tawamnit (barlamaniyya) i Uneẓruf Utrim d umussu n temsetlelt (taḍamun) d weɣref aṣeṛhawi, d tigawt d wussisen n tnarit n Terni n Polisario deg London yellan d yiwet seg tnariyin tiqburin akk n Terni deg Tuṛuft », ɣef wakken ay d-yenna.