Asebter amenzawi

Tabṛat n uselway Bouteflika i wemtil-nnes afṛensis ɣef tmettant n Michel Rocard

LEZZAYER TAMANEɣT– Yuzen uselway n tegduda, Abdelaziz Bouteflika, tabṛat n uɛezzi i wemtil-nnes afṛensis, François Hollande, deffir tmettant n uneɣlaf amenzu aqbur Michel Rocard, d amdan umi isemma uselway Bouteflika d « ameddakel imekdi (wafi) » n Lezzayer, d win yettekkan deg lebni n wassaɣen isindisen « yesɛan ticraḍ n wemqader ».

« S leḥzen d ameqran ay iyi-d-yewweḍ yisali n tmettant n Michel Rocard, aneɣlaf amenzu aqbur d wergaz n uwanak afṛensis, d win ay d-yeǧǧan lateṛ ur iseffḍen deg tallit-nnes yernu d win umi ara necfu s lqanaɛat d lecɣal-nnes », ɣef wakken ay d-yura yiɣef n tmurt deg yizen-nnes.

« S ṛṛuḥ-nnes n thakki d tmuɣli-nnes tameɣradant, yessaweḍ Michel Rocard ad yili d argaz yezwaren lweqt-nnes. Yekseb-d amkan s wazal-nnes deg umezruy n Fṛansa d win n tmura niḍen am tmurt-inu, d tin ay yefhem dakken tettnaɣ ɣef tlelli-nnes », ɣef wakken ay d-iwekked uselway.

« Wa d argaz ifeṛṛzen tiɣawsiwin, yesɛa tabɣest d uɛewwel, yernu yella-d seg gar wid ay ifehmen dakken temɣer n Fṛansa ad d-tili s tezmert n yemḍebbren-nnes akken ad ddun d weḍru n umezruy s ummager n uzarug (istiqlal) n Lezzayer ay d-tekkes s yimenɣi d aqesḥan, sakkin, yettekka deg lebni n wassaɣen isindisen yesɛan ticraḍ n wemqader », ɣef wakken ay d-yenna yiɣef n tmurt.

« Michel Rocard yella d argaz apṛagmati ay yellan ixeddem s tḥeṛci d uɛewwel akken ad yerẓem ibriden i tdinamiyin tinmettiyin d wegrarmud alsan. Abrid ay yeḍfer d win yuklalen leqder yernu yettɣimi-d d amedya, d win aydeg ixemmem ɣef tegnatin s teɣzef yernu yeqbel ad ilint tefratin iweɛṛen ma weɛṛen wuguren », ɣef wakken ay d-yerna.

« I lmend n tegnit-a tuḥzint, ssawaḍeɣ-awen-d aɛezzi-inu seg wul lqayen, s yisem-inu udmawan d win n weɣref d unabaḍ idzayriyen, ama i kenwi, ama i twacult d yeqriben n umeṛḥum », ɣef wakken ay tt-id-yextem uselway Bouteflika.