Asebter amenzawi

Yidir d Sidi Bemol deg Tfaska tis 13 n Tmitar deg Ugadir (Meṛṛuk)

AGADIR– Ad ttekkin yicennayen Yidir d Ccix Sidi Bemol deg Tfaska tis 13 n Tmitar ara d-yilin gar 13 d 16 Yulyu deg Ugadir (anẓul n Meṛṛuk), ɣef wakken ay d-nnan yemsuddsen n tfaska-a.

Yidir d Ccix Sidi Bemol ad gen ibarazen ɣer yidis n wazal n 40 n yinaẓuren seg tmura yemgerraden n Tefrqit, Tuṛuft d Temrikt, gar-asen tacennayt tameṛṛukit Ɛica Tacinwit d ucennay amaṣri Thamer Housny.

Yidir yennum yettekkay deg tfaska-a yernu yesɛa aṭas seg wid ay t-iḥemmlen deg Meṛṛuk anda ay yewwi, seg melmi kan, arraz n « Uṛabab n Wureɣ ».

Deg 2011, yettekka ucennay-a mechuṛen s tezlit n « Baba Inuba » deg Tfaska tis 10 n Mawazin deg temdint n Rrbaṭ.

Deg walbum-nnes aneggaru, « Adrar-inu » ay d-yeffɣen deg 2013, Hamid Cheriet yettwassnen s yisem n « Yidir » tuɣal-it-id cciɛa d tameqrant, ula ma ɣer-s ugar n 30 n yiseggasen aya seg wasmi ur igi abaraz deg Ldzayer.

Deg walbum-nnes ay d-yetteddun ara d-yeffɣen aseggas-a, Yidir ad yecnu d yicennayen ifṛensisen Charles Aznavour d Francis Cabrel.

Ma d Ccix Sidi Bemol (yewwin isem n tegrawt n rock ay d-yessebded deg 1992), yettwassen s yiɣaniben-nnes n rock, agnawi, cceɛbi d uẓawan aqbayli.

Anaẓur Hocine Boukella, yettwassnen s yisem n Sidi Bemol, yebda-d amecwaṛ-nnes deg 1990, yernu icennu, s umata, ɣef unnejli, tarebbawt (baṭala), tileqqa (fuqr) d tsertit.