ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⵉⵙⴻⵎⵙⵉⵍⵜ: ⴰⵊⵎⴰⵄ ⵏ ⵡⵓⴳⴰⵔ ⵏ 700 ⵏ ⵜⵛⵓⵍⵍⵉⴹⵉⵏ ⵏ ⵢⵉⴷⴰⵎⵎⴻⵏ ⴷⴻⴳ ⵡⴰⵢⵢⵓⵔ ⵏ ⵔⴻⵎⴹⴰⵏ
ⵜⵉⵙⴻⵎⵙⵉⵍⵜ– ⵓⴳⴰⵔ ⵏ 700 ⵏ ⵜⵛⵓⵍⵍⵉⴹⵉⵏ ⵏ ⵢⵉⴷⴰⵎⵎⴻⵏ ⴰⵢ ⴷ-ⵢⴻⵜⵜⵡⴰⵊⴻⵎⵄⴻⵏ ⴷⴻⴳ ⵡⴰⵢⵢⵓⵔ ⵏ ⵔⴻⵎⴹⴰⵏ ⵉ ⵡⴰⵎⵎⴰⵙ ⵏ ⵜⵓⴽⵛⵉ ⵏ ⵢⵉⴷⴰⵎⵎⴻⵏ ⵏ ⵜⵡⵉⵍⴰⵢⵜ ⵏ ⵜⵙⴻⵎⵙⵉⵍⵜ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵢⴻⵏⵏⴰ ⵓⵏⴻⵎⵀⴰⵍ-ⵏⵏⴻⵙ (ⵎⵓⴷⵉⵔ).
ⵉⵡⴻⴽⴽⴻⴷ-ⴷ ⵓⴷⵓⴽⵜⵓⵔ ⴰⵍⵉ ⴷⵊⵧⵓⴷⵉ ⴷⴰⴽⴽⴻⵏ ⵢⴻⵍⵍⴰ ⵡⴻⵏⵇⴰⵙ ⴷⴻⴳ ⵡⴻⵊⵎⴰⵄ ⵏ ⵢⵉⴷⴰⵎⵎⴻⵏ ⵖⴻⴼ ⵍⴻⵃⵙⴰⴱ ⵏ ⵔⴻⵎⴹⴰⵏ ⵏ ⵢⵉⵍⵉⵏⴷⵉ ⴰⵢⴷⴻⴳ ⵓⴳⴰⵔ ⵏ 800 ⵏ ⵜⵛⵓⵍⵍⵉⴹⵉⵏ ⴰⵢ ⴷ-ⵢⴻⵜⵜⵡⴰⵍⴻⵇⴹⴻⵏ, ⵢⴻⵔⵏⵓ ⵢⴻⵏⵏⴰ-ⴷ ⴷⴰⴽⴽⴻⵏ ⵢⴻⵍⵍⴰ-ⴷ ⵡⴰⵢⴰ ⵖⴻⴼ ⵍⴵⴰⵍ ⵏ ⵚⵚⴱⴻⵔ ⵓⵔ ⵍⴰ ⵚⴻⴱⴱⵔⴻⵏ ⵢⴻⵎⵚⴻⴷⴷⵇⴻⵏ ⵏ ⵢⵉⴷⴰⵎⵎⴻⵏ ⴰⵢ ⴷ-ⵢⴻⵛⵛⴻⵜⴽⴰⵏ ⵖⴻⴼ ⵡⴰⴽⵓⴷ ⵏ ⵜⵎⴻⵕⵊⵉⵡⵜ, ⵍⴰⴷⵖⴰ ⴷⴻⴼⴼⵉⵔ ⵜⵥⴰⵍⵍⵉⵜ ⵏ ⵜⵜⵕⴰⵡⵉⵃ.
ⴰⵎⵓⵔ ⴰⵎⴻⵇⵔⴰⵏ ⵙⴻⴳ ⵜⵛⵓⵍⵍⵉⴹⵉⵏ ⵏ ⵢⵉⴷⴰⵎⵎⴻⵏ ⵜⵜⵡⴰⵍⴻⵇⴹⴻⵏⵜ-ⴷ ⵙⴷⴰⵜ ⵜⵎⴻⵙⴳⵉⴷⵉⵡⵉⵏ. ⵜⴰⵍⴻⵎⵎⴰⵙⵜ ⵏ ⵍⴻⵄⵎⴻⵕ ⵏ ⵢⴻⵎⵚⴻⴷⴷⵇⴻⵏ ⵜⴻⵜⵜⴻⵣⵣⵉ ⴳⴰⵔ 25 ⴷ 35 ⵏ ⵢⵉⵙⴻⴳⴳⴰⵙⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵏⵏⴰⵏ.
ⵖⴻⴼ ⵍⴻⵃⵙⴰⴱ ⵏ ⵡⴰⵎⵎⴰⵙ ⵏ ⵜⵡⵉⵍⴰⵢⵜ ⵏ ⵜⵓⴽⵛⵉ ⵏ ⵢⵉⴷⴰⵎⵎⴻⵏ, ⵍⵍⴰⵏⵜ-ⴷ 10 ⵜⴻⵎⵀⴰⵍ (ⵄⴰⵎⴰⵍⵉⵢⵢⴰⵜ) ⵏ ⵜⵓⴽⵛⵉ ⵏ ⵢⵉⴷⴰⵎⵎⴻⵏ ⵢⴻⵔⵏⵓ ⴷ ⵜⵉⴷⴷⵓⴽⵍⵉⵡⵉⵏ ⵜⴰⵍⵙⴰⵏⵉⵏ ⴰⵢ ⵜⴻⵏⵜ-ⵉⴳⴰⵏ.
ⵢⴻⴱⴷⴰ-ⴷ ⵡⴰⵎⵎⴰⵙ-ⴰ ⵜⴰⵎⵀⴻⵍⵜ ⵏ ⵡⴻⵙⵃⵓⵍⴼⵓ ⵙ ⵡⴻⵎⵄⴰⵡⴻⵏ ⴷ ⵜⵎⴻⵀⵍⵉⵡⵉⵏ (ⵎⵓⴷⵉⵔⵉⵢⵢⴰⵜ) ⵏ ⵜⴷⴰⵡⵙⴰ ⴷ ⵜⵖⴰⵡⵙⵉⵡⵉⵏ ⵏ ⴷⴷⵉⵏ, ⵜⵉⴷⴷⵓⴽⵍⵉⵡⵉⵏ ⴷ ⵕⵕⴰⵢⴷⵓ ⵜⴰⵎⵏⴰⴹⴰⵏⵜ ⵏ ⵜⵙⴻⵎⵙⴻⵍⵜ, ⵉ ⵍⵎⴻⵏⴷ ⵏ ⵓⵙⵙⴻⵇⵏⴻⵄ ⵏ ⵎⴻⴷⴷⴻⵏ ⴰⴽⴽⴻⵏ ⴰⴷ ⴷ-ⵚⴻⴷⴷⵇⴻⵏ ⵉⴷⴰⵎⵎⴻⵏ, ⵢⴻⵔⵏⵓ ⵜⵜⵡⴰⴼⴻⵔⵇⴻⵏⵜ ⵜⵏⴻⴹⴼⵓⵙⵉⵏ ⴰⵎ ⵡⴰⴽⴽⴻⵏ ⴰⵢ ⴷ-ⵙⵄⴻⴷⴷⴰⵏ ⵉⴷⴻⵍⵍⵉⵍⴻⵏ ⴷⴻⴳ ⵕⵕⴰⴷⵢⵓ ⵉ ⵍⵎⴻⵏⴷ ⵏ ⵜⵃⴻⵎⵍⴰ-ⴰ.
ⵜⵜⵡⴰⵙⴱⴻⴳⵙⴻⵏ-ⴷ ⴷⴰⵖ ⵍⵉⵎⴰⵎⴰⵜ ⴰⴽⴽⴻⵏ ⴰⴷ ⴷ-ⴳⵔⴻⵏ ⵜⵉⵖⵔⵉ ⵉ ⵎⴻⴷⴷⴻⵏ, ⴰⵎ ⵡⴰⴽⴽⴻⵏ ⴰⵢ ⵜⵜⴻⴽⴽⴰⵏⵜ ⵜⵉⴷⴷⵓⴽⵍⵉⵡⵉⵏ ⵏ ⴷⴷⵉⵏ ⴷ ⵢⵉⵙⴻⵇⵇⵓⵎⴰ ⵏ ⵢⴻⴳⵎⴰⵎⴻⵏ (ⴰⵃⵢⴰ’) ⴰⴽⴽⴻⵏ ⴰⴷ ⴳⴻⵏ ⵜⵉⵃⴻⵎⵍⵉⵡⵉⵏ ⵏ ⵜⵓⴽⵛⵉ ⵏ ⵢⵉⴷⴰⵎⵎⴻⵏ ⴷⴻⴳ ⵜⴻⵎⴷⵉⵏⵉⵏ ⴷ ⵜⵖⵉⵡⴰⵏⵉⵏ ⵏ ⵜⵎⵓⵔⵜ ⵙ ⵡⴻⵎⵄⴰⵡⴻⵏ ⴷ ⵢⴻⵖⵙⵓⵔⴻⵏ ⵏ ⵜⴷⴰⵡⵙⴰ ⵜⵓⵇⵔⵉⴱⵜ.
