Asebter amenzawi

Youcef Touati d amarir wis 6 ara d-tessidef MO Bgayet

LEZZAYER TAMANEɣT – Yestenya ulemmas amenṭag afṛensis adzayri, Youcef Touati, ass n lexmis tameddit, leɛqed n 2 n yiseggasen d MO Bgayet, yernu yuɣal d netta ay d amarir wis 6 ara d-tessidef teɣlamt-a deg unebdu-a, ɣef wakken ay aɣ-d-xebbren.

Deg tsemhuyt (mawsim) yezrin, yurar Touati (yesɛan 27 n yiseggasen) d teɣlamt tafṛensist n Chambly (taẓunt tis 3 n Fṛansa) aydeg yettekka deg 20 n temliliyin yernu yessadef 3 n yeswan.

MO Bgayet yessadef-d yagi Yesli (Ilemẓiyen Inaddalen n Leqbayel), Messadia (CS Qsenṭina), Bencherifa (CR Belouizdad, Benmelouka, ay yellan yetturar deg taẓunt tamazdart, am wakken ay d-terra Rahal (Ilemẓiyen Inaddalen n Leqbayel).

Taɣlamt-a ay yettekkan deg weḥric n tkemmucin n Teqbuct n Tkunfidiṛalit, teḍḍef amkan wis sin deg tkemmuct-nnes (tagrawt A) deffir ma turar sin n wussan, yernu d taɣlamt n TP Mazembe ay tt-yezwaren. MO Bgayet ad turar mgal teɣlamt n Mazembe ass n 17 Yulyu deg temdint n Bgayet, deg ukatar n wass wis 3 n wurar.

Taɣlamt-a n Bgayet ay la yesleɣmay, imir-a, Nacer Sendjak, ǧǧan-tt aṭas seg wuẓwiren-nnes am Mebarakou, Zerdab d Hamzaoui.

Seg yidis n tedbelt, yettunefk ussefrek n teɣlamt-a i Zahir Attia ay d-ixelfen Boubakeur Ikhlef.