Asebter amenzawi
Aswir afeɣnami n Terni n Polisario ass n ljemɛa i wefran n umaru amatu amaynu
DEXLA (igriren n yezrazaɣen iṣeḥrawiyen)– Aswir (mu’tamar) afeɣnami n Terni n Polisario, ara yebdun ass n ljemɛa deg Dexla (igriren n yezrazaɣen iṣeḥrawiyen) i wefran n umatu amatu d uselway amaynu n Tegduda Taɛṛabt Taṣeḥrawt Tamegdayt ad ḥedṛen deg-s aṭas n yemttekkiyen d tmagliwin (wufud) tiwerdaniyin.
Mi qqimen yimukan n yiɣef n uwanak d win n umaru amatu n Terni n Polisario d ilmawen deffir tmettant n Mohamed Abdelaziz, nnan-d yimasayen (mas’ulin) iṣeḥrawiyen dakken ad d-yili Weswir afeɣnami deg twilayt n Dexla gar 8 d 9 Yulyu s uberriḥ n « Tadusi, aɛewwel d lebɣi i uḥettem n uzarug aɣelnaw d tnaya ».
Yenna-d uneɣlaf n tɣawsiwin n wezɣar n Uneẓruf Utrim, Mohamed Salem Ould Salek, dakken sqedcen iḥezziben n tmenḍawt taṣeḥrawit d weslagan agensi n Terni n Polisario (ladɣa imagraden 46, 47 d 48) n yiẓuyar n Terni, aydeg ay d-yettwabder dakken lemmer ad yemmet yiɣef n uwanak d umaru amatu n Polisario, d aselway n wegraw aɣelnaw aṣeḥrawi, Khatri Addouh, ara yeḍḍfen imukan-a.
S waya, tga tmarit tamatut n Terni n Polisario, ass n lḥedd yezrin, tadwilt tafeɣnamit akken ad d-tessukk tiṭ ɣef ussewjed n Weswir afeɣnami ddaw tselwit n Mass Addouh, yernu twekked-d dakken wejdent akk tegnatin iwatan i ussuddes n weswir-a aydeg ara ttekkint aṭas n tmagliwin tigraɣlanin, iɣfawen n yinabaḍen, iwamniyen, ikabaren isertanen, tuddsiwin, tiddukliwin, udmawen d ttawilat n yisalan n yal tamnaḍt n umaḍal.
Seg yidis niḍen, tenna-d tmarit tamatut dakken llan-d yisurifen ɣer sdat ama seg yidis n tsertit tagensit n Uneẓruf Utrim, ama seg yidis agraɣlan aydeg imenɣi aṣeḥrawi yerbeḥ-d kra n tɣawsiwin, dɣa d aya ay yesjehden addud n temsalt taṣeḥrawit deg wenrar agraɣlan.
