Asebter amenzawi

Turarion tulambiyin 2016 : ‘’Uriɣ isem-is deg umezruy n waddal azzayri’’ (Makhloufi)

RIO DE JANEIRO – Anaddal azzayri Taoufik Makhloufi yenna-d, ass n ssebt tameddit, dakken yura isem-is deg umezruy n waddal azzayri akked win n tulambiyin seg d-yewwi snat n tzalɣiwin n lfeṭṭa deg tazla n 800 akked 1500 n yimitren deg Turarin Tulambiyin n Rio de Janeiro.

‘’Aql-i ferḥeɣ s uswir iɣer wwḍeɣ. Wwdeɣ lebɣi-w, wwiɣ-d snat n tzalɣiwin n lfeṭṭa deg tazla n 800 akked 1500 n yimitren, mačči d ayen isehlen. Ɣas akken sḥasfeɣ cwiṭ imi d-zgiɣ d wis sin deg 1500 n yimitren maca akken tebɣu tili d tazalɣi n lfeṭṭa. Aql-i tura deg uswir n yimeqqranen. Uriɣ isem-iw deg umezruy n waddal azzayri akked win n turarin tulambiyin s kraḍ tzalɣiwin deg snat tezrigin n turarin tulambiyin’’, i d-yenna Makhloufi i umazun uzzig n Tnegga n APS deg Rio.

‘’D tidet sḥasfeɣ cwiṭ, lliɣ zemreɣ ad rebḥeɣ tazla, ur tewɛir ara ugar, d tazla iyi-d-yusan d taɣezfant aṭas yerna tcud ɣer yimitren ineggura. Sɛiɣ zzher mi ara waliɣ ilɣuɣen imeqqranen amedya n Kiprop neɣ Iguidir gran-d deffir’’, i d-yenna.

Acku yewwi snat tzalɣiwin n lfeṭṭa deg yiwet n tezrigt n turarin, d taɣawsa tayiwnant deg waddal azzayri, yefka-d ttbut Makhloufi dakken d argaz n yisiharen imeqqranen.

S snat tzalɣin yewwi deg 800 akked 1500m, Makhloufi yessared nnif n tikkin tazzayrit deg Turarin n Rio de Janeiro 2016 am wakken i t-yessared daɣen deg Turarin n legliz deg useggas n 2012 s tzalɣa n wureɣ deg tazla n 1500m.