Asebter amenzawi

Tikli i d-yewwi ugellid Yugurten tuɣal d taɣbalut iseg d-tugem tsekla akked tkatut n uɣref n Tefriqt n Ugafa

ƐENNABA – Imekkiyen deg temlilit tussnant tagraɣlant ‘’Yugurten iqubel Ṛum’’ nnan-d ass n lḥedd deg Ɛennaba dakken tikli i d-yewwi ugellid Yugurten tuɣal d taɣbalut iseg d-tugem tsekla akked tkatut n yimezdaɣ n Tefriqt n Ugafa.

Deg wass wis sin n yimuhal n temlilit tussnant, i d-iḍerrun deg tzeqqa n umezgun amnaḍan Azzedine Medjoubi, derrern-d yimsaragen dakken takatut n uɣref tettwali Yuguten d agellid asaḍ, d win ineṭgen ɣef wakal-is akken ur tbeḍḍu ara Numidya, amennuɣ-is mgal Rum terra-t d azamul n wezbu.

Tenna-d tesdawant Malha Benbrahem Benhamdouche seg tesdawit n Paris (Fransa) dakken yuɣal Yugurten, seg ugellid amaziɣ ‘’yebnan’’ aḥric seg Umezruy n Tefriqt n Ugafa ɣer ‘’uzamul’’ n tmagit taɣelnawt i rran yimeɣnasen n tmentilt taɣelnawt d amedya ara ḍefren.

Tamazzagt n umezruy aqbur tudder-d deg uḍris-is idlisen akked tirawin i d-yesbenen tikli tayiwnant i d-yewwi mmi-s n mmi-s n Masensen (Masensen d jeddi-s n Yugurten), amedya n yisefra s tmaziɣt n umedyaz Idir Ait Amrane, fɣen-d deg useggas n 1947 akked yiwen n udlis azwel-is Izen n Yugurten "Le message de Jugurtha" izreg-d deg useggas n 1945 ameskar-is d Mohamed-Cherif Sahli akked udlis n Jean Mouhoub Amrouche Yugurten, ur yettmettat ara "Jugurtha, l’immortel" deg useggas n 1943.