Asebter amenzawi
Taṛmist Blue Origin tekkes taduli ɣef yiwen n usenfar n useḍru n tmeẓdit mm tezmert tameqqrant
WASHINGTON – Taṛmist n temguri n tesnafegt Blue Origin tettheyyi ad tebnu yiwet n tmeẓdit yesɛan tazmert tameqqrant, teɣzef-is annect n Saturn V n wahil Apollo n uslak n wayyur, i d-yenna ass n letniyen uɣella-s Jeff Bezos.
Timeẓdit New Glenn --d tajmilt i John Glenn, amarikani amezwaru i yeḥban ɣef wakal-- ad tesɛu sin neɣ kraḍ wannagen, tasekta n wekdu-s deg-s sa (7) n yimitren, tazmert n uqelleɛ-is deg-s 1.700 n yiṭunen ara d-yekken seg sa (7) n yimsedduyen (BE-4) i yesserɣayen urrig agaman akked wuksijin aḥlulan. Iswi i nefka i wannag amezwaru d asexdem-is yal tikkelt.
Mass Bezos yules-d i beɣɣu-s akken ad yurar tamlilt s wazal-is deg uḥric-a n temguri n tesnafegt akked tallunant.
Timeẓdit New Glenn ad tezmer ad tɛebbi igensaten akked yimdanen, akka ad ḥaref tiṛmisin timarikaniyin SpaceX akked Boeing i la yesneflayen isenfaren am wayla-s neɣ rnu-d daɣen taṛmist tafransit Ariane Space deg wayen yerzan tarusi deg uḥbu n yigensaten.
Taswiɛt-a, Blue Origin tcar New Shepard, d timeẓdit meẓẓiyen deg-s snat temrawin n yimitren deg teɣzef-is. Tezmer kan ad taweḍ ɣer talast n tallunt s aḥbu n wadda n tmiḍi (100) n yikilumitren.
Deg yiwen n ubug yersen deg udeg n Internet n uɣmis n Washington Post, Mass Bezos yesseddid dakken timeẓdit New Glenn ad tewǧed i waffug seg-a ɣer taggara n mraw n yiseggasen.
Taṛmist Blue Origin, i yebɣan daɣen ad tesnefli tamerrit tanaḥbut, tettheyyi Tufga n weɛraḍ deg uḥbu akked New Shepard ayyur i d-iteddun, ɣef wakken i yenna uɣmis Washington Post. Deg taɣult-a, tettemḥaraf akked teṛmist Virgin Galactic n umerkanti abriṭani Richard Branson.
Aciri n teṛmist Blue Origin yusa-d, ur wwiḍen ara sin n yimalas seg mi i d-yeḍra uṭerḍeq n tmeẓdit Falcon 9 n teṛmist SpaceX deg uzadur-is n uciri yellan deg Uwanek n Flurida mi ɛerḍen asiɣi n yimsedduyen, d asehwu wis sin i d-yeḍran deg mraw d semmus (15) n wayyuren-a yezrin.
Taṛmist SpaceX tebɣa ad tessider aṭas azal n usikel ɣer tallunt. Inǧaḥen-is yeṭṭuqten huccen aḥric-a maca taṛmist tezmer ad teqqim tṣemmer deg tegnit ddeqs n wayyuren, aya ad tt-yeṭṭef ur tzemmer ara ad teɛreḍ ad tessifeg amcir-is aẓayan, Falcon Heavy.
