Asebter amenzawi
Suq Ahṛas: 3 n Yisuda n Ussileɣ ara d-iwejden uqbel Ctembeṛ 2017
SUQ AHṚAS – 3 n Yisuda Iɣelnawen Yemmuzzgen deg Ussileɣ Asaduran ara d-iwejden seg-a ɣer Ctembeṛ 2017 deg Suq Ahṛas, ɣef wakken ay aɣ-d-txebber tmehla n ussileɣ (takwin) d welmud asaduran.
Asudu (maɛhad) Aɣelnaw Yemmuzzgen deg Ussileɣ Asaduran n Mdawṛuc ad yesɛu 300 n yimukan d unaḍḍas n 120 n wusuten. Asudu-a ad yemmuzzeg deg tkerrazt, ladɣa deg tkessawt n lmal ameẓyan, tadawsa (ṣiḥḥa) n yiɣersiwen, asfulleḥ n yemɣan n udawi d lɣellat timeqranin, ɣef leḥsab n tmehla n ussileɣ.
Asudu Aɣelnaw Yemmuzzgen deg Ussileɣ Asaduran (mihani) wis sin d win ay yemmuzzgen deg tmerrit (siyaḥa) d yisensa, yernu la t-bennun deg temdint n Suq Ahṛas. Ma d asudu wis 3 d win n ussileɣ deg ṣṣenɛat n tkerrazt, lebni d yimahilen inagduden, yernu la t-bennun deg tɣiwant n Sedṛata. Asudu-a daɣ yesɛa 300 n yimukan yernu ad ifak s lebni uqbel tgara n useggas-a, ɣef wakken ay d-tenna tmehla n ussileɣ.
Daɣ, i lmend n wuɣal ɣer uɣerbaz deg wayyur-a n Ctembeṛ, tenna-d tmehla dakken fuken lebni n yifer adeblan, ifer n tsenselkimt d unaḍḍas n 60 n wusuten deg Wammas n Ussileɣ Asaduran d Usselmed n Mdawṛuc.
La d-yettili daɣ uxeddim i lebni n Wammas n Ussileɣ Asaduran d Usselmed n 250 n yimukan deg tɣiwant n Zzeɛṛuṛeyya d lebni n 4 n tneɣriyin (aqsam) d 2 n tnemsal (waracat) i ussemɣer n tzemmar n Wammas n Ussileɣ Asaduran d Usselmed deg Mṛahna.
