Asebter amenzawi

Lbuṛj Buɛṛiṛiǧ: taɣiwant n Wlad Sidi Bṛahim ad as-d-ssiwḍen aman seg wuggug n Tlesdit

LBUṚJ BUƐṚIṚIǦ – Yenna-aɣ-d, ass n letniyen, unemhal n teɣbula n waman, Abdelali Ghdiri, dakken imezdaɣen n tɣiwant n Wlad Sidi Bṛahim (ataram n twilayt n Lbuṛj Buɛṛiṛij) wwḍen-ten waman n tissit seg wuggug (sadd) n Tlesdit (tawilayt n Tubiret).

Deffir ma gan ineɛruḍen itwilanen (tiqniyya) yesseqnaɛen, serrḥen-d i waman akken ad awḍen ɣer tɣiwant n Wlad Sidi Bṛahim, yernu ad tuɣal tɣiwant-a tesɛa aman deg yiḍ, deg wass, ɣef wakken ay d-yenna Mass Ghdiri, ay d-yesmektin dakken ccɣel-a yella-d aḥric seg usenfar n ussiweḍ n waman seg wuggug n Tlesdit i 5 n tɣiwanin n tdayṛa n Lmenṣura (Lmenṣura, Wlad Sidi Bṛahim, Lemhir, Ḥerraza d Bendawen.

Yenna-d daɣ dakken tiɣiwanin n Lemhir d Lmenṣura ur ttɛeḍḍilent ad ttwaqqnent ɣer uẓeḍḍa n waman mi ara faken yixeddimen lebni n uẓeḍḍa n waman n tɣiwanin n Ḥerraza d Bendawen. ɣef leḥsab n umasay-a (mas’ul), lecɣal-a ad ǧǧen imezdaɣen n tɣiwanin-a ad hennin seg wuguren n lexṣaṣ n waman, ladɣa imi ay neqsen waman n ddaw tmurt yernu qquren 21 n wunan (abyar) deg temnaḍt-a deg unebdu n 2016.

Tamhelt-a (ɛamaliyya) tesqam-d 10 n yimelyaṛen n yidinaṛen, yernu d tin aydeg ssersen 198 n yikilumitren n yijeɛbuben, 12 n teɣsar (maḥaṭṭat) n wejɣar d 14 n lxeznat n waman yesɛan tazmert n 27.000 n yimitren igasasen (m3), ɣef wakken ay aɣ-d-xebbren.