ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵎⴻⵙⵜⵖⴰⵏⴻⵎ: ⴱⴻⴷⴷⵓ ⵏ ⵍⴻⴱⵏⵉ ⵏ ⵍⴼⵉⵔⵎⴰ ⵏ ⵜⴰⵔⵎⵉⵜ ⵉ ⵜⴽⴻⵙⵙⴰⵡⵜ ⵏ ⵢⵉⵙⴻⵍⵎⴰⵏ

ⵎⴻⵙⵜⵖⴰⵏⴻⵎ – ⵓⵔ ⵜⴻⵜⵜⵄⴻⴹⴹⵉⵍ ⴰⴷ ⵜⴻⴱⴷⵓ ⵜⴻⵙⴷⴰⵡⵉⵜ ⵏ « ⴰⴱⴷⴻⵍⵀⴰⵎⵉⴷ-ⵉⴱⵏ-ⴱⴰⴷⵉⵙ » ⵏ ⵎⴻⵙⵜⵖⴰⵏⴻⵎ ⵍⴻⴱⵏⵉ ⵏ ⵢⵉⵡⴻⵜ ⵏ ⵍⴼⵉⵔⵎⴰ ⵜⴰⵔⵎⴰⵏⵜ (ⵜⴰⴵⵔⵉⴱⵉⵢⵢⴰ) ⵏ ⵜⴽⴻⵙⵙⴰⵡⵜ ⵏ ⵢⵉⵙⴻⵍⵎⴰⵏ ⴷ ⵜⴻⵙⵏⵓⴷⴻⵔⵜ ⵜⴰⵡⵍⴰⵍⵜ (ⴱⴰⵃⵔⵉⵢⵢⴰ) ⴷⴻⴳ ⵜⵖⵉⵡⴰⵏⵜ ⵏ ⵙⵜⵉⴷⵢⴰ (15 ⵏ ⵢⵉⴽⵉⵍⵓⵎⵉⵜⵔⴻⵏ ⴷⴻⴳ ⵓⵜⴰⵔⴰⵎ ⵏ ⵎⴻⵙⵜⵖⴰⵏⴻⵎ), ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵎⵀⴰⵍ ⵏ ⵜⴻⵙⴷⴰⵡⵉⵜ-ⴰ.

ⵢⴻⵏⵏⴰ-ⴷ ⵡⴻⵒⵕⵓⴼⵉⵙⵓⵔ ⵎⵓⵙⵜⴰⵒⵀⴰ ⴱⴻⵍⵀⴰⴽⴻⵏ ⴷⴻⴳ ⵢⵉⵡⴻⵏ ⵏ ⵡⴻⵎⵢⴰⴳⴻⵔ ⴷ ⵜⵖⴻⵎⵙⴰ ⴷⴰⴽⴽⴻⵏ ⴰⵙⴻⵏⴼⴰⵔ-ⴰ ⴰⴷ ⴷ-ⵉⵃⴰⵣ 4 ⵏ ⵢⵉⵇⴻⵟⵟⴰⵔⴻⵏ, ⵢⴻⵔⵏⵓ ⴰⵙⵎⵉ ⴰⵔⴰ ⵉⴼⴰⴽ, ⴰⴷ ⴷ-ⵜⵜⵉⵍⵉⵏⵜ ⴷⴻⴳ-ⵙ ⵜⴻⵣⵔⴰⵡⵉⵏ (ⴷⵉⵔⴰⵙⴰⵜ) ⵖⴻⴼ ⵍⴻⵚⵏⴰⴼ ⵢⴻⵎⴳⴻⵔⵔⴰⴷⴻⵏ ⵏ ⵢⵉⵖⴻⵔⵙⵉⵡⴻⵏ ⵏ ⵢⵉⵍⴻⵍ, ⴰⵎ ⵡⴰⴽⴽⴻⵏ ⴰⵔⴰ ⴷ-ⵙⵙⵉⵍⵉⵖⴻⵏ ⴷⴻⴳ-ⵙ ⵉⵏⴻⵍⵎⴰⴷⴻⵏ ⴷⴻⴳ ⵡⴻⵏⵔⴰⵔ-ⴰ ⵉ ⵍⵎⴻⵏⴷ ⵏ ⵡⴻⵙⵏⴻⴼⵍⵉ (ⵜⴰⵏⵎⵉⵢⴰ) ⵏ ⵜⴽⴻⵙⵙⴰⵡⵜ ⵏ ⵢⵉⵙⴻⵍⵎⴰⵏ.

ⵍⴻⴽⵡⴰⵖⴻⴹ ⵉⴷⴻⴱⵍⴰⵏⴻⵏ ⵉ ⵜⵎⴻⵙⵖⵉⵡⵜ ⵏ ⵡⴰⴽⴰⵍ ⴷ ⵜⵜⴻⵙⵔⵉⵃⴰⵜ ⵏ ⵍⴻⴱⵏⵉ ⵡⴻⵊⴷⴻⵏ, ⵢⴻⵔⵏⵓ ⵓⵔ ⵜⵜⵄⴻⴹⴹⵉⵍⴻⵏ ⴰⴷ ⴼⴻⵔⵏⴻⵏ ⵜⴰⵕⵎⵉⵙⵜ (ⵛⴰⵔⵉⴽⴰ) ⴰⵔⴰ ⴷ-ⵢⴻⵍⵀⵓⵏ ⵙ ⵍⴻⴱⵏⵉ.

ⵙⴻⴳ ⵢⵉⴷⵉⵙ ⵏⵉⴹⴻⵏ, ⵍⴰ ⵜⵜⴽⴻⵎⵎⵉⵍⴻⵏ ⴰⵅⴻⴷⴷⵉⵎ ⵏ ⵍⴻⴱⵏⵉ ⵏ ⵡⴰⵛⵃⴰⵍ ⵏ ⵢⵉⵙⴻⵏⴼⴰⵔⴻⵏ ⴷⴻⴳ ⵢⵉⵖⵉⵡⵏⴻⵏ (ⴽⵓⵍⵍⵉⵢⵢⴰⵜ) ⵢⴻⵎⴳⴻⵔⵔⴰⴷⴻⵏ ⵏ ⵜⴻⵙⴷⴰⵡⵉⵜ-ⴰ, ⴰⵎ ⵍⴻⴱⵏⵉ ⵏ ⵙⵏⴰⵜ ⵏ ⵜⵣⴻⵖⵡⵉⵏ ⵏ ⵢⵉⵙⴰⵔⴰⴳⴻⵏ ⴷ ⵓⵀⴻⵢⵢⵉ ⵏ ⵜⵣⴻⵖⵖⴰ ⵏⵉⴹⴻⵏ, ⴷⵖⴰ ⴷ ⴰⵢⴰ ⴰⵔⴰ ⵢⴻⵙⵙⵉⵡⴹⴻⵏ ⵜⵉⵣⴻⵎⵎⴰⵔ ⵏ ⵜⵣⴻⵖⵡⵉⵏ-ⴰ ⵖⴻⵔ ⵓⵊⴻⵎⵎⴰⵍ ⵏ 900 ⵏ ⵢⵉⵎⵓⴽⴰⵏ ⴷⴻⴳ ⵢⵉⵖⵉⵡⵏⴻⵏ ⵏ ⵜⵓⵙⵙⵏⵉⵡⵉⵏ ⴷ ⵜⴻⵙⵏⴰⵜⵡⵉⵍⵉⵏ (ⴰⵙⵓⴷⵓ ⴰⵇⴱⵓⵔ ⵏ ⵜⵉⵊⵊⴻⵏⵢⴻⵕⵜ ⵏ ⵜⴽⴻⵔⵔⴰⵣⵜ) ⴷ ⵓⵖⴻⵔⴱⴰⵣ ⵉⵎⵉⵏⴻⴳ ⵏ ⵜⴽⴻⵔⵔⴰⵣⵜ, ⴰⵎ ⵡⴰⴽⴽⴻⵏ ⴰⵢ ⵍⴰ ⴱⴻⵏⵏⵓⵏ ⵉⵃⴷⴻⵔ ⵉ ⵢⵉⵏⴰⵔⵎⴻⵏ (ⵎⴰⵅⴰⴱⵉⵔ) ⴷ ⵙⵉⵏ ⵏ ⵢⵉⵃⴻⴷⵔⴻⵏ ⵉⵙⴻⵏⵙⴻⴳⵎⴰⵏⴻⵏ.

ⵓⵔ ⵜⵄⴻⴹⴹⵉⵍⴻⵏ ⴷⴰⵖ ⴰⴷ ⴼⴰⴽⴻⵏ ⵙ ⵍⴻⴱⵏⵉ ⵢⵉⵡⴻⵜ ⵏ ⵜⵣⴻⵖⵖⴰ ⵜⴰⴽⴰⴷⴷⴰⵍⵜ ⴷⴻⴳ ⵓⵙⵓⴷⵓ (ⵎⴰⵄⵀⴰⴷ) ⵏ ⵓⵙⵙⴻⴳⵎⵉ ⴰⴼⴻⴽⴽⴰⵏ ⴷ ⵡⴰⴷⴷⴰⵍⴰⵏ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵅⴻⴱⴱⵔⴻⵏ.