Asebter amenzawi
Mestɣanem: tukci n warraz n « Lamir Ɛebdelqader » i wesmal n tudert ddukkli
MESTɣANEM– Yettunefk « Warraz n Lamir Ɛebdelqader i Wesmal n Tudert Ddukkli, n tudert deg talwit deg Wegrakal d umaḍal » yettunefk, ass n laṛebɛa tameddit deg Mestɣanem, i 3 n wudmawen igraɣlanen ay yettekkan s waṭas deg temsal-a, yernu yella-d waya s weḥdaṛ n uneɣlaf n yedles, Azzedine Mihoubi.
Kraḍ n wudmawen ay d-yettwasemman akken ad awin arraz-a nitni d aneɣlaf aqbur n tɣawsiwin n wezɣar n Lezzayer, Mass Lakhdar Brahimi, ay ixedmen daɣ d abdammas agraɣlan n Yeɣlanen Yeddukklen, am wakken ay yexdem d amalal n umaru amatu n Temɣunt Taɛṛabt. Adiplumati-a yerbeḥ-d ttejṛiba meɣɣren mliḥ deg uferru n tlufa n umaḍal, deg Ɛiraq, deg Afɣanistan, deg Tefriqt n Wenẓul, deg Lubnan neɣ deg Surya.
Sin n wudmawen niḍen ay yewwin arraz-a d Aspenyuli Frederico Mayor, d anemhal amatu aqbur n UNESCO yernu d imsebded n Temsisit n Tɣermiwin n Yeɣlanen Yeddukklen, yernu d aselway n Tesbeddit i Yedles n Talwit, ma d wayeḍ d Raymond Chretien, d anmahal (safir) aqbur yernu d aselway Usanay (marṣad) Agraɣlan n Yimesɣiwanen i lmend n Tudert Ddukkli.
Imi ay iɣab Frederico Mayor, d anmahal n Spenyul deg Lezzayer, Alejandro Polanca Matas, ay d-yeḍḍfen arraz-nni.
Tafugla (ḥafl) n tukci n warraz-a tettwassuddes deg tesɣimt n « Tesbeddit n Djenatu El Arif » yellan d yiwen seg yidisan ay d-ijebden ṛṛay n warraz-a s wemɛawen d tuddsa tarnabaḍt tagraɣant n AISA d Wahil n MED 21. D anmahal n Lezzayer deg Yeɣlanen Yeddukklen, Driss El Djazairi, yiwen seg warraw n warraw n Lamir Ɛebdelqader, ay yesselwin tafugla-a ɣer yidis n Massa Fadila Laanan ay yeḍḍfen amkan n tmarut n uwanak yernu d taneɣlaft-taselwayt n unabaḍ afṛankufuni n Bruxelles.
