ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⴻⵜⵜⵓⵏⴻⴼⴽ ⵜⵙⴰⴽⴱⴰⴱⵜ ⵉ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉ ⵓⵙⵙⵓⵜⴻⵔ ⵏ ⵜⵙⴻⴼⵔⴰⵏⵜ ⵏ ⵓⴳⴳⵓⵛⵛⴻⵍⵎⴰⵏ ⵉ ⵡⴻⵖⵔⴻⴼ ⴰⵚⴻⵃⵔⴰⵡⵉ

ⴳⴻⵏⴻⵠⴻ (ⵙⵙⵡⵉⵙ) – ⵢⴻⴼⴽⴰ ⵓⵙⴻⵇⵇⴰⵎⵓ ⴰⵙⵡⵉⵙⵉ ⵏ ⵡⴻⴷⵀⴰⵍ ⵏ ⵡⴻⵖⵔⴻⴼ ⴰⵚⴻⵃⵔⴰⵡⵉ ⵉ ⵜⵓⴷⴷⵙⴰ ⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ, ⵢⵉⵡⴻⵜ ⵏ ⵜⵙⴰⴽⴱⴰⴱⵜ ⴰⵢ ⴷ-ⵙⵜⴻⵏⵢⴰⵏ ⵎⴻⴷⴷⴻⵏ ⵉ ⵓⵙⵙⵓⵜⴻⵔ ⵏ ⵓⵙⵙⵓⴷⴷⴻⵙ ⵏ ⵜⵙⴻⴼⵔⴰⵏⵜ, ⴰⵙⴻⴳⴳⴰⵙ ⴰⵢ ⴷ-ⵢⴻⵜⵜⴻⴷⴷⵓⵏ, ⵉ ⵓⴳⴳⵓⵛⵛⴻⵍⵎⴰⵏ (ⵜⴰⵇⵔⵉⵔ ⵎⴰⵚⵉⵔ) ⵏ ⵓⵏⴻⵥⵔⵓⴼ ⵓⵜⵔⵉⵎ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⵏⴻⴳⴳⴰ ⵏ ⵜⵖⴻⵎⵙⴰ ⵜⴰⵚⴻⵃⵔⴰⵡⵉⵜ ⴰⵙⵙ ⵏ ⵍⴻⵅⵎⵉⵙ.

ⵉⴳⴰ ⵓⵙⴻⵇⵇⴰⵎⵓ-ⴰ ⵜⴰⵎⴻⵙⴽⴰⵏⵜ (ⵉⵃⵜⵉⴵⴰⴵ) ⴰⵙⵙ ⵏ ⵍⴻⵅⵎⵉⵙ ⵙⴷⴰⵜ ⵍⴻⵇⵚⴻⵔ ⵏ ⵢⴻⵖⵍⴰⵏⴻⵏ ⴷⴻⴳ ⴳⴻⵏⴻⵠⴻ (ⵙⵙⵡⵉⵙ) ⴰⴽⴽⴻⵏ ⴰⴷ ⴷ-ⵢⴻⵙⵙⴽⴻⵏ ⵜⴰⵎⵙⴻⵜⵍⴻⵍⵜ (ⵜⴰⴹⴰⵎⵓⵏ) ⴷ ⵡⴻⵖⵔⴻⴼ ⴰⵚⴻⵃⵔⴰⵡⵉ ⵙ ⵓⵙⴻⵏⵜⴻⵍ ⵏ « ⴰⵏⴻⵥⵔⵓⴼ ⵓⵜⵔⵉⵎ – ⵜⴰⵙⴻⴼⵔⴰⵏⵜ ⵉⵎⵉⵔ-ⴰ ».

ⵜⴻⵍⵍⴰ-ⴷ ⵜⵎⴻⵙⴽⴰⵏⵜ-ⴰ ⵉ ⵡⴻⵙⴼⵓⴳⴻⵍ ⵏ ⵓⵎⵓⵍⵍⵉ ⵡⵉⵙ 40 ⵏ ⵓⵙⵙⴻⴱⴷⴻⴷ ⵏ ⵓⵙⴻⵇⵇⴰⵎⵓ-ⴰ, ⵢⴻⵔⵏⵓ ⵢⴻⵍⵍⴰ-ⴷ ⵡⴰⵢⴰ ⴷ ⵜⴰⴳⵏⵉⵜ ⵉ ⵡⴻⵙⵎⴻⴽⵜⵉ ⵙ 40 ⵏ ⵢⵉⵙⴻⴳⴳⴰⵙⴻⵏ ⵏ ⵓⵅⴻⴷⴷⵉⵎ ⵡⴰⵔ ⴰⵃⴱⴰⵙ ⵖⴻⵔ ⵢⵉⴷⵉⵙ ⵏ ⵡⴻⵖⵔⴻⴼ ⴰⵚⴻⵃⵔⴰⵡⵉ ⴷ ⵢⵉⵎⴻⵏⵖⵉ-ⵏⵏⴻⵙ ⵓⵣⵔⵉⴼ ⴰⴽⴽⴻⵏ ⴰⴷ ⴷ-ⵢⴻⴽⴽⴻⵙ ⴰⵣⵔⴻⴼ-ⵏⵏⴻⵙ ⵏ ⵜⵍⴻⵍⵍⵉ ⴷ ⵓⵣⴰⵔⵓⴳ (ⵉⵙⵜⵉⵇⵍⴰⵍ).

ⵉⵇⴻⴷⴷⴻⵎ-ⴷ ⵓⵙⴻⵇⵇⴰⵎⵓ-ⴰ ⵜⴰⵛⵔⴰⵡⵜ ⵏ ⵢⵉⵡⴻⵜ ⵏ ⵜⵃⴻⵎⵍⴰ ⴰⵢ ⴷ-ⵢⴻⴱⴷⴰ ⴷⴻⴳ ⵢⴻⵏⵏⴰⵢⴻⵔ ⵏ 2015 ⴰⴽⴽⴻⵏ ⴰⴷ ⴷ-ⵉⴳⴻⵔ ⵜⵉⵖⵔⵉ ⵉ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉ ⵓⵙⵙⵓⴷⴷⴻⵙ ⵏ ⵜⵙⴻⴼⵔⴰⵏⵜ ⴷⴻⴳ ⵓⵏⴻⵥⵔⵓⴼ ⵓⵜⵔⵉⵎ ⴰⵙⴻⴳⴳⴰⵙ ⴰⵢ ⴷ-ⵢⴻⵜⵜⴻⴷⴷⵓⵏ, ⴰⵎ ⵡⴰⴽⴽⴻⵏ ⴰⵢ ⵢⴻⴼⴽⴰ ⵜⴰⵙⴰⴽⴱⴰⴱⵜ ⴰⵢ ⴷ-ⵉⵊⴻⵎⵄⴻⵏ ⵉⵣⵎⴰⵍⴻⵏ (ⵉⵎⴹⴰ’ⴰⵜ) ⵙⴻⴳ ⵡⴰⵟⴰⵙ ⵏ ⵜⵎⵓⵔⴰ.

ⵃⴻⴷⵕⴻⵏ ⴷⴻⴳ ⵜⵎⴻⵙⴽⴰⵏⵜ-ⵏⵏⵉ ⴰⵟⴰⵙ ⵙⴻⴳ ⵢⵉⵚⴻⵃⵔⴰⵡⵉⵢⴻⵏ ⴰⵢ ⵢⴻⴷⴷⵔⴻⵏ ⴷⴻⴳ ⵜⵎⵓⵔⴰ ⵜⵓⵕⵓⴼⵉⵢⵉⵏ, ⵍⴰⴷⵖⴰ ⴼⵕⴰⵏⵙⴰ, ⴱⵉⵍⵊⵉⴽ, ⵙⵒⴻⵏⵢⵓⵍ, ⵍⴰⵍⵎⴰⵏ ⴷ ⵙⵙⵡⵉⵙ.