ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⵙⵙⵡⴰⵢ ⵏ ⵜⴽⴻⵔⵔⴰⵣⵜ: ⵀⴻⵢⵢⴰⵏ-ⴷ 450 ⵏ ⵢⵉⵇⴻⵟⵟⴰⵔⴻⵏ ⴷⴻⴳ ⵎⴰⴳⵕⴰ (ⵎⵙⵉⵍⴰ)
ⵎⵙⵉⵍⴰ – 22 ⵏ ⵢⵉⵣⵣⵉⴽⵉⵜⴻⵏ (ⵎⵓⵃⵉⵟⴰⵜ) ⵏ ⵜⴽⴻⵔⵔⴰⵣⵜ ⴰⵢ ⴷ-ⵀⴻⵢⵢⴰⵏ ⴷⴻⴳ ⵜⴷⴰⵢⵕⴰ ⵏ ⵎⴰⴳⵕⴰ (ⴰⴳⵎⵓⴹ ⵏ ⵎⵙⵉⵍⴰ) ⴰⴽⴽⴻⵏ ⴰⴷ ⴰⵙⴻⵏ-ⵙⵙⵉⵡⴹⴻⵏ ⴰⵎⴰⵏ ⵏ ⵡⴻⵙⵙⵡⴰⵢ, ⵢⴻⵔⵏⵓ ⴷ ⴰⵢⴰ ⴰⵔⴰ ⵢⴻⴵⴵⴻⵏ 450 ⵏ ⵢⵉⵇⴻⵟⵟⴰⵔⴻⵏ ⵏ ⵡⴰⴽⴰⵍ ⴰⴷ ⵜⴻⵏ-ⴰⵡⴹⴻⵏ ⵡⴰⵎⴰⵏ ⴷⴻⴳ ⵓⵙⴻⴳⴳⴰⵙ ⵏ 2017, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵏⵏⴰⵏ, ⴰⵙⵙ ⵏ ⵍⴻⵅⵎⵉⵙ, ⵢⵉⵎⴻⵥⵍⴰ ⵏ ⵜⵡⵉⵍⴰⵢⵜ-ⴰ.
ⴰⵙⵙⵡⴰⵢ ⵏ ⵢⵉⵣⵣⵉⴽⵉⵜⴻⵏ-ⴰ ⵏ ⵜⴽⴻⵔⵔⴰⵣⵜ ⴰⴷ ⴷ-ⵢⵉⵍⵉ ⵙ ⵓⵏⴰⴳⵔⴰⵡ ⵉⵎⴻⵙⵡⵉ ⴰⵔⴰ ⴷ-ⵢⴻⵙⵙⵉⵡⴹⴻⵏ ⴰⵎⴰⵏ ⵙⴻⴳ ⵡⵓⴳⴳⵓⴳ (ⵙⴰⴷⴷ) ⵏ ⵙⵓⴱⴻⵍⵍⴰ, ⵢⴻⵔⵏⵓ ⵍⴻⴱⵏⵉ ⵏ ⵡⵓⴳⴳⵓⴳ-ⴰ ⴰⴷ ⵉⴼⴰⴽ ⴰⵙⴻⴳⴳⴰⵙ ⴰⵢ ⴷ-ⵢⴻⵜⵜⴻⴷⴷⵓⵏ, ⵖⴻⴼ ⵍⴻⵃⵙⴰⴱ ⵏ ⵢⵉⵎⴻⵥⵍⴰ (ⵎⴰⵚⴰⵍⵉⵃ) ⵏ ⵜⵡⵉⵍⴰⵢⵜ ⴰⵢ ⴷ-ⵢⴻⵔⵏⴰⵏ ⴷⴰⴽⴽⴻⵏ ⵓⴳⴳⵓⴳ-ⴰ ⴰⴷ ⵢⴻⵙⵙⴻⵡ 1000 ⵏ ⵢⵉⵇⴻⵟⵟⴰⵔⴻⵏ ⵏ ⵡⴰⴽⴰⵍ ⵏ ⵜⴽⴻⵔⵔⴰⵣⵜ ⴷⴻⴳ ⵡⴰⵛⵃⴰⵍ ⵏ ⵜⵖⵉⵡⴰⵏⵉⵏ ⵏ ⵜⵡⵉⵍⴰⵢⵜ ⵏ ⵎⵙⵉⵍⴰ.
ⵓⴳⴰⵔ ⵏ 200 ⵏ ⵢⵉⴽⴻⵔⵔⴰⵣⴻⵏ ⴰⵔⴰ ⵉⵖⴻⵍⵍⵜⴻⵏ ⵉⵣⵣⵉⴽⵉⵜⴻⵏ-ⴰ ⴰⵢ ⴷ-ⵢⵓⵙⴰⵏ ⵙⴷⴰⵜ ⵡⵓⴳⴳⵓⴳ ⵏ ⵙⵓⴱⴻⵍⵍⴰ, ⵢⴻⵔⵏⵓ ⴷ ⴰⵎⵄⵉⵛ ⵏ ⵍⵎⴰⵍ ⴰⵔⴰ ⵙⴼⵓⵍⵍⵃⴻⵏ ⴷⴻⴳ ⵡⴰⴽⴰⵍ-ⴰ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵅⴻⴱⴱⵔⴻⵏ.
ⵏⵏⴰⵏ-ⴷ ⴷⴰⵖ ⵢⵉⵎⴻⵥⵍⴰ ⵏ ⵜⵡⵉⵍⴰⵢⵜ ⴷⴰⴽⴽⴻⵏ ⴰⵟⴰⵙ ⵏ ⵢⵉⴽⴻⵔⵔⴰⵣⴻⵏ ⵏ ⵜⴻⵎⵏⴰⴹⵜ-ⴰ ⴰⵢ ⵉⵏⴻⵇⵔⴻⵏ ⴰⴽⴰⵍ ⴰⴽⴽⴻⵏ ⴰⴷ ⴷ-ⵙⴽⴻⴼⵍⴻⵏ ⴰⵎⴰⵏ ⵏ ⴷⴷⴰⵡ ⵜⵎⵓⵔⵜ ⵉ ⵡⴻⵙⵙⵡⴰⵢ, ⵙⴻⴳ ⵍⴻⵄⴹⵉⵍ ⴰⴷ ⴷ-ⵢⴻⵡⵊⴻⴷ ⵡⵓⴳⴳⵓⴳ-ⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵡⴻⴽⴽⴷⴻⵏ ⴷⴰⴽⴽⴻⵏ ⴰⵙⴻⵏⴼⴰⵔ ⵏ ⵓⵙⵙⵉⵡⴻⴹ ⵏ ⵡⴰⵎⴰⵏ ⵙⴻⴳ ⵙⵓⴱⴻⵍⵍⴰ ⴷ ⴰⵢⴻⵏ ⴰⵔⴰ ⵢⴻⵙⵏⴻⵔⵏⵉⵏ ⴰⵙⵙⴻⴼⵜⵉ ⴷⴻⴳ ⵜⴻⵎⵏⴰⴹⵉⵏ-ⴰ ⵏ ⵜⴽⴻⵔⵔⴰⵣⵜ.
ⴰⵙⴻⵏⴼⴰⵔ ⵏ ⵍⴻⴱⵏⵉ ⵏ ⵡⵓⴳⴳⵓⴳ ⵏ ⵙⵓⴱⴻⵍⵍⴰ ⵢⴻⵜⵜⵡⴰⵡⴻⴽⴽⴻⵍ ⵉ ⵢⵉⵡⴻⵜ ⵏ ⵜⴻⵕⵎⵉⵙⵜ (ⵛⴰⵔⵉⴽⴰ) ⵜⴰⵏⴰⴳⴷⵓⴷⵜ, ⵢⴻⵙⵄⴰ ⵜⴰⵣⵎⴻⵔⵜ ⵏ 18 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ (ⵎ3). ⵎⴻⵏⵖⵉⵔ ⴰⵙⵙⵡⴰⵢ ⵏ ⵜⴽⴻⵔⵔⴰⵣⵜ, ⵓⴳⴳⵓⴳ-ⴰ ⴰⴷ ⴷ-ⵢⴻⴼⴽ ⴷⴰⵖ ⴰⵎⴰⵏ ⵏ ⵜⵉⵙⵙⵉⵜ ⵉ ⵢⵉⵎⴻⵣⴷⴰⵖⴻⵏ ⵏ ⵜⴻⵎⵏⴰⴹⵜ-ⴰ.
