Asebter amenzawi

Suq Ahṛas: tamussni n lqanun tessefk deg ussebded n teṛmisin (isdawanen)

SUQ AHṚAS – Yessefk ad ssnen yinelmaden lqanun mi ara lemmden deg tesdawit akken ad d-sbedden tiṛmisin (carikat), ɣef wakken ay d-nnan wid ay iḥedṛen, ass n lexmis deg Suq Ahṛas, deg wextam n teẓrigt tamezwarut n tesdawit n unebdu ɣef weṛmas (muqawala) d ussebded n teṛmisin timeẓyanin.

Deg usarag-nnes ay d-iga ɣef tmussniwin n llsas deg lqanun n yiweẓla (aɛmal), yenna-d Wepṛufisur Kamel Ferhaoui dakken timussniwin deg lqanun d ayen ara yeǧǧen inelmaden ad d-kesben llsisan n wamek ara sferken tiṛmisin-nsen, ladɣa deg wayen yerzan iguta (ɛuqud) uzzigen, timesɣiwt s lekra d lqanun n ussefti, ccṛeɛ deg temsal n tnezzut d tɣawsiwin niḍen yesɛan azal deg tdamsa.

Yessebɣes daɣ inelmaden n yiɣiwnen (kulliyyat) n tdamsa ad ssnen s telqey tadamsa, ladɣa tadamsa tasertant d wayen yeqqnen ɣer lqanun deg wayen yerzan tadrimt, assuder (istihlak) d ufares.

Agensas (mumattil) n Tbanka n Wesnefli Adigan (maḥalliyya), Mass Mahmoud Guelmami, yessawel-d deg usarag-nnes ɣef tsekkirin (iǧra’at) n tbankiwin deg wesnulfu n teṛmisin timeẓyanin, am wakken ay d-iwekked ɣef ussifses yellan deg wenrar-a.

Wid ay iḥedṛen deg teẓrigt-a tamezwarut ay d-yellan deg tesdawit n « Mohamed-Cherif-Messaadia » ɛawden wekkden-d ɣef wazal n wesmal n yedles n weṛmas d wezraɛ-nnes gar yinelmaden isdawanen akken ad d-tili tnezgart gar tesdawit d umaḍal n uxeddim.