ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⴰⵊⵎⵉⵍⵜ ⵉ ⵢⴻⴷⵍⴻⵙ ⴰⴽⵓⵔⵉ ⴷⴻⴳ ⵍⴻⵣⵣⴰⵢⴻⵔ ⴳⴰⵔ 4 ⴷ 8 ⵜⵓⴱⴻⵕ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵏⵏⴰ-ⴷ ⵡⴻⵏⵎⴰⵀⴰⵍ (ⵙⴰⴼⵉⵔ) ⵏ ⵜⴻⴳⴷⵓⴷⴰ ⵏ ⴽⵓⵔⵢⴰ ⴷⴻⴳ ⵍⴻⵣⵣⴰⵢⴻⵔ, ⵒⴰⵔⴽ ⵙⴰⵏⴳ-ⵊⵉⵏ, ⴰⵙⵙ ⵏ ⵍⵃⴻⴷⴷ ⴷⴻⴳ ⵍⴻⵣⵣⴰⵢⴻⵔ ⵜⵎⴰⵏⴻⵖⵜ, ⴷⴰⴽⴽⴻⵏ ⴰⴷ ⵜⴻⵜⵜⵡⴰⵙⵙⵓⴷⴷⴻⵙ ⴳⴰⵔ 4 ⴷ 8 ⵜⵓⴱⴻⵕ ⴷⴷⵓⵕⵜ ⵜⴰⴷⴻⵍⵙⴰⵏⵜ ⵏ ⴽⵓⵔⵢⴰ ⵏ ⵡⴻⵏⵥⵓⵍ ⴷⴻⴳ ⵍⴻⵣⵣⴰⵢⴻⵔ, ⴷ ⵜⵉⵏ ⴰⵔⴰ ⴷ-ⵢⴻⵙⴱⴰⵏⴻⵏ ⵜⴰⵏⴹⴰ (ⵜⴰⵏⴰⵡⵡⵓⵄ) ⴷ ⵜⵉⵎⵎⴻⵕⴽⴰⵏⵜⵉⵜ ⵏ ⵜⵎⵓⵔⵜ-ⴰ ⵏ ⴰⵙⵢⴰ.

ⵜⴰⵥⵔⵉⴳⵜ-ⴰ (ⵟⴰⴱⵄⴰ) ⵜⴰⵎⴻⵣⵡⴰⵔⵓⵜ ⵜⴻⵜⵜⵡⴰⵙⵙⵓⴷⴷⴻⵙ ⵙ ⵍⴻⵎⵄⴰⵡⵏⴰ ⴷ ⵢⴻⵖⵍⵉⴼⴻⵏ ⵏ ⵜⵖⴰⵡⵙⵉⵡⵉⵏ ⵏ ⵡⴻⵣⵖⴰⵔ, ⵏ ⵢⴻⴷⵍⴻⵙ ⴷ ⵢⵉⵍⴻⵎⵥⵉⵢⴻⵏ ⴷ ⵡⴰⴷⴷⴰⵍ, ⵢⴻⵔⵏⵓ ⴰⴷ ⴷ-ⵉⵍⵉⵏⵜ ⴷⴻⴳ-ⵙ ⵜⴻⴷⵢⴰⵏⵉⵏ ⵢⴻⵇⵇⵏⴻⵏ ⵖⴻⵔ ⵢⵉⵏⵓⵔⴰⵔ ⵢⴻⵎⴳⴻⵔⵔⴰⴷⴻⵏ, ⴳⴰⵔ-ⴰⵙⴻⵏ ⵓⵍⴰ ⴷ ⵜⴰⵎⴳⵓⵔⵉ (ⵚⵉⵏⴰⵄⴰ), ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⵡⴻⵏⵎⴰⵀⴰⵍ.

ⴰⵟⴰⵙ ⵏ ⵢⴻⵔⵎⵓⴷⴻⵏ (ⵏⴰⵛⴰⵟⴰⵜ) ⴰⵢ ⵙⵙⴻⴼⵔⴰⵏ ⴰⴷ ⴷ-ⵉⵍⵉⵏ ⴷⴻⴳ ⵢⵉⵏⵓⵔⴰⵔ ⵏ ⵙⵙⵉⵏⵉⵎⴰ, ⴰⵎⴻⵣⴳⵓⵏ, ⴰⵙⵙⴻⵡⵍⴻⴼ (ⵜⴰⵚⵡⵉⵔ) ⴷ ⵓⵙⵙⴻⵡⵡⵉ ⵉ ⵡⴻⵙⴱⴰⵏⵉ ⵏ ⵡⵓⴷⵎⴰⵡⴻⵏ ⵢⴻⵎⴳⴻⵔⵔⴰⴷⴻⵏ ⵏ ⵢⴻⴷⵍⴻⵙ ⴰⴽⵓⵔⵉ ⴰⵎⴰ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ, ⴰⵎⴰ ⴷⴻⴳ ⵇⵙⴻⵏⵟⵉⵏⴰ.

ⵖⴻⵔ ⵢⵉⴷⵉⵙ ⵏ ⵢⵉⵙⵓⵔⴰ, ⵜⵉⵎⴻⵣⴳⵓⵏⵉⵏ ⴷ ⵢⵉⴱⴰⵔⴰⵣⴻⵏ ⵏ ⵓⵥⴰⵡⴰⵏ, ⴰⴷ ⴷ-ⵉⵍⵉⵏ ⴷⴰⵖ ⵢⴻⵔⵎⵓⴷⴻⵏ ⴰⴷⴷⴰⵍⴰⵏⴻⵏ, ⴰⵎ ⵡⴰⴽⴽⴻⵏ ⴰⵔⴰ ⴷ-ⵉⵍⵉⵏ ⵡⴰⵀⵉⵍⴻⵏ ⵉ ⵢⵉⴳⴻⵔⴷⴰⵏ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵥⴰⵡⴰⵏ, ⴰⴷ ⴷ-ⵙⵄⴻⴷⴷⵉⵏ ⵜⴰⵎⴻⵍⵍⴰⵖⵜ (ⴽⵓⵎⵉⴷⵢⴰ) ⵜⴰⵏⵥⴰⵡⴰⵏⵜ ⵏ « ⵏⴰⵏⵜⴰ », ⴷ ⵜⴰⵎⴻⵍⵍⴰⵖⵜ ⵜⴰⵙⵓⵙⴰⵎⵜ ⴰⵢⴷⴻⴳ ⴰⵔⴰ ⴷ-ⵡⵜⴻⵏ ⴰⵥⴰⵡⴰⵏ ⴰⵏⵙⴰⵢⴰⵏ ⴰⴽⵓⵔⵉ ⵓⵎⵉ ⵜⵜⵉⵏⵉⵏ « ⵙⴰⵎⵓⵍⵏⵧⵔⵉ ».

ⴰⴷ ⴷ-ⵜⵉⵍⵉ ⴷⴰⵖ ⵜⵣⵉⴽⴽⴻⵏⵜ ⵏ ⵓⵙⵙⴻⵡⵍⴻⴼ ⵓⵎⵉ ⵙⴻⵎⵎⴰⵏ « ⵛⵛⴱⴰⵃⴰ ⵏ ⴽⵓⵔⵢⴰ: ⴰⵎⵜⴰⵡⴰ ⴷ ⵓⵎⴻⵣⵔⵓⵢ ».

ⵙⴻⴳ ⵢⵉⴷⵉⵙ ⵏ ⵓⵙⵙⴻⵡⵡⵉ, ⴰⴷ ⵣⴻⵎⵔⴻⵏ ⵢⵉⵏⴻⵔⵣⴰⴼⴻⵏ ⵉⴷⵣⴰⵢⵔⵉⵢⴻⵏ ⴰⴷ ⵙⵙⵏⴻⵏ ⴰⵙⵙⴻⵡⵡⵉ ⴰⴽⵓⵔⵉ – ⵎⴻⵛⵀⵓⵕⴻⵏ ⵙ ⵜⵖⴰⵔⴰ ⴷ ⵜⴻⵏⴹⴰ-ⵏⵏⴻⵙ – ⵙ ⵓⵇⴻⴷⴷⴻⵎ ⵏ ⴽⵔⴰ ⵏ ⵢⵉⵙⵓⴼⴰⵔ ⴷ ⵡⴻⵄⵔⴰⴹ-ⵏⵙⴻⵏ ⴷⴻⴳ ⵢⵉⵡⴻⵜ ⵏ ⵜⵣⵉⴽⴽⴻⵏⵜ ⴰⵢⴷⴻⴳ ⴰⵔⴰ ⴷ-ⵙⵙⴻⵔⵙⴻⵏ ⵓⵍⴰ ⴷ ⵉⴼⴰⵔⵉⵙⴻⵏ ⵉⴽⵓⵔⵉⵢⴻⵏ ⵏ ⵜⴽⴻⵔⵔⴰⵣⵜ.

ⴰⴷ ⴷ-ⵢⵉⵍⵉ ⴷⴰⵖ ⵡⴻⵎⵙⵉⵣⵡⴻⵔ (ⵎⵓⵙⴰⴱⴰⵇⴰ) ⵏ ⵜⴻⵏⴼⴰⵍⵉⵜ ⵜⵉⵏⵉⵎⵉⵜ (ⵛⴰⴼⴰⵡⵉⵢⵢⴰ) ⵙ ⵜⵓⵜⵍⴰⵢⵜ ⵜⴰⴽⵓⵔⵉⵜ, ⴷ ⵡⵉⵏ ⴰⵢⴷⴻⴳ ⵣⴻⵎⵔⴻⵏ ⴰⴷ ⴷ-ⵔⴻⴱⵃⴻⵏ ⵢⴻⵎⵜⵜⴻⴽⴽⵉⵢⴻⵏ ⵜⴰⴳⴳⴰⵣⵉⵏ ⵉ ⵡⴻⵣⵔⴰⵡ ⴷⴻⴳ ⴽⵓⵔⵢⴰ ⵏ ⵡⴻⵏⵥⵓⵍ.