Asebter amenzawi

Human Rights Watch tetthem FIFA s weqbal n « tukerḍa » n wakal afalesṭini

LQUDS yettwaḍḍfen – Tuddsa n Human Rights Watch tetthem FIFA s weqbal n « tukerḍa » n wakal afalesṭini imi ay teqbel ad d-ilint temliliyin n tfidiṛalit tisṛayilit n tcirḍart deg tehras (mustawṭanat) ay tebna Isṛayil deg Ugemmaḍ Utrim yettwaḍḍfen.

Deg yiwen n uṛabul n Human Rights Watch, teḥṛes tuddsa-a aselway n FIFA, Gianni Infantino, akken ad iqader lɛuhud-nnes n wesmeskel (iṣlaḥ) yernu ad yeḥbes timliliyin ara d-yilin deg tehras ddaw leɛnaya n tfidiṛalit tisṛayilit n tcirḍart ay yettekkan deg Tfidiṛalit Tagraɣlant n Tcirḍart.

Tamsalt n tehras tisṛayiliyin deg Ugemmaḍ Utrim afalesṭini d yiwet seg temsal ara d-yettwabedren deg temlilit n useqqamu aslekman (tanfidi) n FIFA ara yemlilen ussan n 13 d 14 Tubeṛ.

Tuddsa-a tarnabaḍt (ɣar ḥukumiyya) n yizerfan n wemdan tesɛa tasɣimt-nnes (maqar) deg New York yernu tetthem FIFA s uɛawen n tehras s webrid arusrid, d uttekki deg werkaḍ n lqanun alsan agraɣlan d yizerfan n wemdan.

« Tessames FIFA urar ucbiḥ n tcirḍart imi ay teqbel ad d-ilint temliliyin deg yikalen yettwakren », ɣef wakken ay d-yenna Sari Bashi, amasay (mas’ul) adigan n Human Rights Watch, deg yiwen n welɣu (bayan).

Tuddsa-a n yizerfan n wemdan tesmektay-d dakken assehres (istiɛmar) yeffeɣ i lqanun agraɣlan. Seg wasmi ay yettwaḍḍef Ugemmaḍ Utrim deg 1967, 500.000 n yemharsen (mustawṭinin) isṛayiliyen ay yeddan ad zedɣen deg yikalen ifalesṭiniyen, ɣef leḥsab n Tuddsa n Yeɣlanen Yeddukklen.