Asebter amenzawi
Yessefk ad ɛeddin yinejrimen isṛayiliyen deg ccṛeɛ ɣef tmenɣiwt n Yifalesṭiniyen (Amnesty)
LONDON– Tenna-d, ass n laṛebɛa, tuddsa tagraɣlant n yizerfan n wemdan n Amnesty International, dakken tijrimin ay gan yiɣallen n tuḍḍfa tisṛayilit mgal Yifalesṭiniyen sskanayen-d « taḥeqranit yessexlaɛen i tudert n wemdan », yernu inejrimen ay tent-igan yessefk ad ɛeddin deg ccṛeɛ akken ad tfak tegnit-a aydeg qqimen ur ttwaɛaqben.
« Azal n useggas deffir ma tewweḍ tekriḍt (ɛunf) ɣer tqacuct deg Yikalen ifalesṭiniyen yettwaḍḍfen, mazal la d-sskanayen yiɣallen isṛayiliyen taḥeqranit tufḍiḥt i tudert n wemdan s usseqdec n yiɣil ineɣɣen, war lmizan yernu beṛṛa i lqanun, mgal Yifalesṭiniyen », ɣef wakken ay d-tenna Amnesty International deg yiwen n welɣu (bayan).
Tenna-d tuddsa-a dakken tuzen aṛabul i yiduba isṛayiliyen ass n 14 Ctembeṛ, d win aydeg d-tebder 20 n liḥalat n tejrimt mgal Yifalesṭiniyen ay nɣan yiɣallen n tuḍḍfa tisṛayilit, yernu tenna-d dakken yessefk ad d-ilin yeḥtacen ɣef tmenɣiwin-a ay d-yellan s tmeɛmada.
Amnesty International twekked-d dakken, ma ulac, 15 seg liḥalat ay d-yettwabedren deg uṛabul-a d Ifalesṭiniyen ay yettwenɣan « s tmeɛmada », yili ur llin ara akk d tuggza (tahdid) i yiɣallen isṛayiliyen, yernu akk timenɣiwin-nni ffɣent i lqanun.
Yenna-d daɣ welɣu-a dakken « iduba isṛayiliyen » ur d-rrin ɣef yiɣeblan n Amnesty International ay d-yennan dakken « tecɣeb-itt s telqey » tmerniwt n tejrimin mgal weɣref afalesṭini.
