Asebter amenzawi

Wehṛan: aḥkam s tmettant i 3 n yiremmaɣen ay yettekkan deg tmenɣiwt n yiwen n umesɣiwan

WEHṚAN, – Yeḥkem-d wexxam n ccṛeɛ n Wehṛan, ass n ttlata, s tmettant ɣef 3 n yiremmaɣen (irhabiyyin) ay yenɣan amesɣiwan n tɣiwant n Lbuṛj n Lamir Ɛebdelqader (Tisemsilt) deg Dujembeṛ 2014. Iremmaɣen-a mazal ur ttwaḍḍfen.

Ffɣen-d leḥkam n gar 4 n yiseggasen n lḥebs d lḥebs s teɣzef n tudert ɣef 8 n yimetthumen niḍen ay iḥedṛen deg ccṛeɛ-a, ma d yiwen ɛfan-as.

Timenɣiwt-a tella-d ass n 12 Dujembeṛ 2014, mi d-ufan amesɣiwan-a n 56 n yiseggasen yemmut deg lfirma-nnes ay d-yusan deg wemkan umi ttinin Lferca, ay ibeɛden s kra n yikilumiten ɣef Lbuṛj n Lamir Ɛebdelqader.

Amesɣiwan-a yettwet s sin n yeɛbaṛen yernu yemmzel. Aḥtac ay d-bdan yimeẓla (maṣaliḥ) n tɣellist yessaweḍ ɣer weɛqal n wid ay igan tajrimt-a taremmaɣt d wid ay yefkan deg-s afus.

Gar yemdanen-a, yella usefrak (musayyir) n lfirma-a ay yessafessen ccɣel i yinejrimen-nni. D netta ay d-yewwin amesɣiwan ɣer yiwen n wemkan akken, zuna, ad as-yessken kra n wakraren ay as-yenna uḍnen.

Imetthumen ay iḥedṛen deg ccṛeɛ nekṛen ayen ayyes ttwattehmen, maca yenna-d ugensas n weɣlif anagdud dakken ifukal-nsen ur sseqnaɛen.