Asebter amenzawi

Tettwafren Ldzayer d tamaslaḍt deg useqqamu n Tuddsa Tagraɣlant n Temsafga Taɣarimt

LDZAYER TAMANEɣT– Tettwafren Ldzayer, ass n ttlata, d tamaslaḍt (ɛuḍwa) deg Tuddsa Tagraɣlant n Temsafga Taɣarimt, yernu d nettat ara d-yeggensesen timura n Lmeɣreb d Tefriqt n Ugafa deg tuddsa-a, ɣef wakken ay d-yenna Weɣlif n Yimahilen Inagduden d Umesni deg yiwen n welɣu (bayan).

« Tettwafren Ldzayer d tamaslaḍt deg useqqamu n Tuddsa Tagraɣlant n Temsafga Taɣarimt yernu d tagensast n tmura n Lmeɣreb d Tefriqt n Ugafa i lewṣaya n 3 n yiseggasen yernu yella-d waya deg tefranin n 4 Tubeṛ 2016 deg tesɣimt (maqar) n Tuddsa-a deg Montreal (Kanada) », ɣef wakken ay d-yenna weɣlif.

Tettwafren Ldzayer s 151 n tuɣac seg gar 172, ɣef wakken ay d-rnan.

Tessers-d Ldzayer iman-nnes d tamazwart (muṛaccaḥa) i uttekki deg useqqamu n Tuddsa i uggenses n temnaḍt n Tefriqt n Ugafa deg 3 n yiseggasen ay d-yetteddun, ɣef wakken ay d-yenna weɣlif n yimahilen inagduden d umesni dduṛt yezrin.

Timliliyin n tedwilt tis 39 n wegram amatu n Tuddsa-a bdant-d ass n 27 n Ctembeṛ yernu mazal ad kemmlen arma d 7 Tubeṛ.

Agraw amatu n Tuddsa-a d netta ay d agman-nnes anayan (siyadi). Yettemlili, ma ulac, tikkelt i 3 n yiseggasen, yernu d Aseqqamu ay d-yeggaren tiɣri i temlilit n Wegraw-a. D Agraw-a ay d-yessefrayen tasertit tanmaḍalt n Tuddsa Tagraɣlant n Temsafga Taɣarimt i 3 n yiseggasen ay d-yetteddun.

I wesmekti, Tuddsa-a teqqen ɣer Yeɣlanen Yeddukklen, yernu lecɣal-nnes igejdanen d attekki deg uheyyi n tegna (maɛayir) i lmend n ussizeɣ n umesni agenwan agraɣlan.