Asebter amenzawi

Azal n 30 n yedlisen imaynuten s tmaziɣt i Tmesrit Tagraɣlant tis 21 n Wedlis n Ldzayer

LDZAYER TAMANEɣT – Azal n 30 n yedlisen imaynuten s tmaziɣt ara d-yersen deg Tmesrit Tagraɣlant tis 21 n Wedlis n Ldzayer ara ireẓmen ass n 27 Tubeṛ. Idlisen-a ad ten-id-yawi Useqqamu Unnig i Timmuzɣa yernu ad ilin gar-asen yedrawalen, imawalen, ixeddimen isdawanen d tsuɣlin tiseklanin.

Agdud ad yezmer ad iẓer idlisen-a deg tmugert (maɛraḍ) yernu ad d-ilint daɣ tɣimiyin n ussenzi s heddu. Ad d-yefser daɣ Useqqamu Unnig i Timmuzɣa idlisen n teẓrigin tinagdudin d tusligin ay d-yeffɣen s wemɛawen d Useqqamu.

Yuɣ lḥal, Aseqqamu iga ticcurka d yimaẓragen (nacirin) iɣelnawen am Anep, OPU (Adiwan n Tsufiɣin Tisdawanin), tiẓrigin n Tira, « Voir par le savoir » d teẓrigin niḍen i lmend n wesbeyyen n wedlis amaziɣ d wezraɛ-nnes, ɣef wakken ay d-yessefhem Useqqamu Unnig i Timmuzɣa deg uqeddem n wahil-nnes.

Yettunefk daɣ wemkan s wazal-nnes i yimawalen yemmuzzgen s tentaliwin timaziɣin yemgerraden (taznatit, tacawit, tamaceɣt, atg.), deg tkerrazt d wawalen imaynuten, am wakken ay d-ffɣen daɣ yedlisen ɣef usselmed, ismawen n twaculin, ungalen d tsuɣlin n yedlisen ay d-yeffɣen naqal s taɛṛabt d tefṛensist.

La yessefray Useqqamu Unnig i Timmuzɣa, daɣ, ad yeg ass n 3 Wamber d « Ass uzzig i timmuzɣa », yernu aḥric seg wass-nni ad d-qeddmen deg-s tisnatwilin (tiknuluǧiyyat) timaynutin d dduṛ-nsent deg wesmal n tmaziɣt.

Ad d-tili Tmesrit Tagraɣlant tis 21 n Wedlis n Ldzayer seg 27 Tubeṛ ɣer 6 Wamber deg Leqṣer n Tzikknin deg Uzumbi n Yilel deg Ldzayer Tamaneɣt.