Asebter amenzawi

Taɣlamt taɣelnawt n tcirḍart: yettaxer Milovan Rajevac (d unṣib)

LEZZAYER TAMANEɣT – Tenna-d Tfidiṛalit Tadzayrit n Tcirḍart, ass n ttlata tameddit deg udeg-nnes unṣib dakken asleɣmay aɣelnaw Milovan Rajevac yettaxer seg wemkan-nnes.

« Yettaxer Mass Milovan Rajevac ass n ttlata 11 Tubeṛ 2016 seg wemkan-nnes n wesleɣmay aɣelnaw n teɣlamt n Lezzayer », ɣef wakken ay d-tenna Tfidiṛalit Tadzayrit deg yiwen n welɣu (bayan) wezzilen mliḥ.

Tafidiṛalit ur d-tefki acemma n ttfaṣil ɣef ssebbat ay yeǧǧan asleɣmay-a ad yettixer neɣ isurifen ara yettwaddmen seg-a ɣer sdat i usemmi n wesleɣmay amaynu.

Tella-d temlilit, deg tezwara n tmeddit n wass n ttlata gar uselway n Tfidiṛalit, Mohamed Raouraoua, d wesleɣmay aserbi Rajevac deg wammas atwilan n Sidi Musa (Lezzayer Tamaneɣt).

Ssebba n temlilit-a d tagadda-nni (musawat) ay tga Lezzayer deg temlilit-nnes n tcirḍart mgal Kamrun d wurfan ay rfan kra n yikataren n teɣlamt deg wayen yerzan afran n wesleɣmay-a aserbi.

Yettwafren-d Rajevac (62 n yiseggasen) deg Yunyu yezrin ɣef yiɣef n teɣlamt taɣelnawt n Lezzayer deg wemkan n Wefṛensis Christian Gourcuff, deffir ma yettwabṭel leɛqed n uneggaru-a s tin n leɛqel deg Meɣres 2016.

Ala snat n temliliyin ay yessefrek wesleɣmay-a aserbi. Yiwet d tin ay turar Lezzayer mgal Lesotho yernu terbeḥ deg-s s 6 ɣer 0 deg wass wis 6 yernu d aneggaru n Teqbuct n Tefriqt n Yeɣlanen n 2017. Timlilit tis snat d tin mgal Kamrun ay ifuken s 1 ɣer 1, ass n lḥedd deg usarir n Mustapha-Tchaker deg Leblida deg ukatar n wass amezwaru n temliliyin n waffas n Teqbuct n Umaḍal n 2018 ara d-yilin deg Rrus.