Asebter amenzawi

Imenɣi mgal ukeyyef: addud yeddukklen n tmura tifriqiyin deg Usarag n New Delhi

LEZZAYER TAMANEɣT – Imttekkiyen ifriqiyen deg temlilit n Tuddsa Tanmaḍalt n Tdawsa (ṣiḥḥa) ɣetsen ad sdukklen addud-nsen, ass n ttlata deg Lezzayer Tamaneɣt, uqbel ma ttekkan deg Usarag n New Delhi deg Wamber ay d-yetteddun.

S waya, ɣetsent tmura tifriqiyin ad sdukklent addud-nsent deg yimenɣi mgal ukeyyef deg Tefriqt i lmend n uttekki deg Usarag n yidisan ara d-yilin deg New Delhi deg Wamber ay d-yetteddun, ɣef wakken ay d-yessefhem ugensas (mumattil) n weɣlif n tdawsa.

Imttekkiyen deg temlilit-a ay d-yellan deg Lezzayer Tamaneɣt gar 10 d 11 Tubeṛ, weṣṣan-d ɣef weḍfar n ttejṛiba tadzayrit deg yimenɣi mgal ukeyyef, d ussejhed n uɛahed asertan n yinabaḍen (ḥukumat) n tmura n temnaḍt d uferru n wuguren ay ibedden deg webrid n yimenɣi-a.

47 n tmura tifriqiyin ay yettekkan deg temlilit-a, yernu cekṛent-d ttejṛiba n Lezzayer ay ireẓmen ammas n tuɛjilin tisnajyanin deg wesbiṭar asdawan n Mustapha-Pacha (Lezzayer Tamaneɣt) yernu ammas-a ad yettwassidrem s yedrimen n leɣrama n ddexxan, yernu nnant-d tmura-a dakken ttejṛiba-a d « turbiḥt ».

Msefhamen daɣ yemttekkiyen ɣef ttawilat ayyes ara ḥezzben i ukeyyef deg Tefriqt d ussemɣer n wahilen n uḥezzeb akken ad d-ḥazen inurar yemgerraden s weḍfar n umedya adzayri ay d-yesbedden aseqqamu gar yeḥricen ay yesselwi uneɣlaf amenzu.