Asebter amenzawi
Tadawsa : iger-d Sellal tiɣri i ussebded n ticcurkiwin timaynutin d Yikubiyen
HAVANA– Iger-d uneɣlaf amenzu, Abdelmalek Sellal, tiɣri, ass n laṛebɛa, deg Havana, i lmend n ussebded n ticcurkiwin timaynutin d Yikubiyen deg wenrar n tdawsa (ṣiḥḥa), ladɣa i lmend n ussejhed n yimenɣi mgal ukensir.
« Yessefk ad nexdem ɣef ussebded n teṛmist (carika) tuxliḍt ara yesrebḥen idisan-nneɣ deg sin », ɣef wakken ay d-yenna Sellal deg yiwet n terzi ɣef wammas n tijjenyeṛt tajinant d tebyusnatwilt deg Havana.
Yenna-d dakken ssuq yella yernu « ad d-yessidef aṭas n yedrimen », am wakken ay d-yerna dakken « aya yettɣimi-d d tamuɣli tasuddsant (istratiǧiya) d tmatut n snat-a n tmura » i yimenɣi amellil (naǧiɛ) mgal ukensir.
Ammas n tijjenyeṛt tajinant d tebyusnatwilt n Kuba yennulfa-d deg 1986, yernu iswi-nnes d asnefli n yisafaren s tmussniwin n tebyusnatwilt i lmend n udawi n yimuḍinen. Ammas-a yettakf-d i Lezzayer aṭas n yisafaren, gar-asen Heberprot-P, ay yettɛawanen deg tujjya n tuksi n uḍar n umuḍin n sskeṛ, d Heberbiovac HB, d tagezzayt (liqaḥ) mgal waḍḍan n tentast n tasa.
Ammas-a d netta ay d amezwaru deg Temrikt Talatinit yernu d wis 3 deg umaḍal deg wayen yerzan tizemmar-nnes deg unadi d wesnefli, ɣef leḥsab n umasay-nnes (mas’ul) n ussenzi deg Tefriqt n Ugafa, Ibis Portvondo.
Deg terzi n Mass Sellal, yedda daɣ uneɣlaf adzayri n tɣawsiwin n wezɣar, Ramtane Lamamra, d uneɣlaf n tdawsa (ṣiḥḥa), Abdelmalek Boudiaf. Tirzi-a tunṣibt n 3 n wussan tebda-d ass n laṛebɛa, yernu tella-d s uneɛruḍ n wenmazul amezwaru n uselway n Useqqamu n Uwanak d Useqqamu n yineɣlafen n tegduda n Kuba, Mass Bermudez.
Iwekked-d Mass Sellal, mi yuweḍ ɣer Havana, ɣef « ufazi » d « ljehed » n wassaɣen gar Lezzayer d Kuba, am wakken ay d-yerna dakken snat-a n tmura ad kemmlent axeddim ddukli. Yenna-d daɣ uneɣlaf amenzu dakken yettḥulfu i yiman-nnes deg Kuba amzun deg tmurt-nnes ay yella, yernu iwekked-d dakken assaɣen gar snat-a n tmura mazal ad ddun ɣer sdat.
