Asebter amenzawi
Taɣlamt taɣelnawt: asleɣmay ad yili yettwafren-d asmi ara turar Lezzayer d Nijirya (Raouraoua)
LEZZAYER TAMANEɣT– Yenna-d uselway n Tfidiṛalit Tadzayrit n Tcirḍart, Mohamed Raouraoua, ass n laṛebɛa, dakken asleɣmay amaynu ara d-ixelfen Aserbi Milovan Rajevac, yezmer ad d-yettwafren uqbel ma turar Lezzayer mgal Nijirya deg 12 Wamber ay d-yetteddun deg Uyo deg ukatar n wass wis sin n temliliyin n waffas n Teqbuct n Umaḍal n 2018.
« Seg wass n lexmis ara nebdu isurifen i ussemres n wesleɣmay amaynu ara yilin deg weswir, d win ara yilin yesɛa ttejṛiba, ladɣa deg temsalt n teɣwalt (ittiṣal). Yezmer lḥal ad yili wesleɣmay amaynu yettwafren-d yagi asmi ara d-tili temlilit mgal Nijirya », ɣef wakken ay d-yenna Raouraoua deg tliẓri taɣelnawt.
Yettaxer Milovan Rajevac seg wemkan-nnes ass n ttlata, deffir temlilit-nni ay ifuken s tgadda mgal Kamrun (1 ɣer 1) ass n lḥedd tameddit deg usarir n Mustapha-Tchaker deg Leblida, deg ukatar n wass amezwaru n temliliyin n waffas n Teqbuct n Umaḍal n 2018.
« Taɣlamt-nneɣ tesɛa azal, d isleɣmayen ay d-yettasen ɣer-neɣ, maci d nekkni ay yetteddun ɣer-sen. Nessebded-d tasmilt ara izerwen akk ikaramen n yimazwaren yernu ad d-tefk tigrayin-nnes i tnarit tafidiṛalit ara yeddmen ṛṛay aneggaru deg wayen yerzan asleɣmay amaynu », ɣef wakken ay d-yenna umasay amezwaru n Tfidiṛalit. Deg wayen yerzan ssebba n uttixer n Rajevac deffir 3 kan n wayyuren seg wasmi ay d-yudef, yenna-d Raouraoua dakken yella-d yid-s « wugur n teɣwalt ».
