Asebter amenzawi

Nɣan yiɣallen n tuḍḍfa tisṛayilit yiwen n wegrud afalesṭini deg Ɣezza

ɣEZZA – Nɣan yiɣallen isṛayiliyen n tuḍḍfa, ass n laṛebɛa deg Khan Younes (deg wenẓul-agmuḍan n Ɣezza) yiwen n wegrud afalesṭini n 10 n yiseggasen s rrṣaṣ, ɣef wakken ay d-nnant kra n teɣbula tifalesṭiniyin.

Ashraf al-Qudra, amutlay (naṭiq) n weɣlif n tdawsa (ṣiḥḥa) n Hamas deg tesfift n Ɣezza, yenna-d dakken aqcic-nni nɣan-t yiserdasen isṛayiliyen ay iqerrsen rrṣaṣ deg temnaḍt n Khan Younes.

« Abdullah al-Naseef ay yesɛan 10 n yiseggasen, nɣan-t yiɣallen n tuḍḍfa tisṛayilit s rrṣaṣ sdat wexxam-nnes ay d-yusan deg tɣiwant n Qarara, sdat Khan Younes », ɣef wakken ay d-yenna umutlay-a.

Nnan-d kra n yinagan ifalesṭiniyen dakken taredsa (ǧayc) tisṛayilit tqerres-d seg yiwen n uzadur (qaɛida) aserdasan ay d-yusan sdat tlisa.